УИХ-ын гишүүн, Халдашгүй байдлын дэд хорооны дарга Ч.Улаанаас цөөн асуултад хариулт авлаа.
- Сүүлийн үед УИХ-ын гишүүдийн халдашгүй эрхийн талаархи асуудал хөндөгдөх боллоо. Эдгээр асуудал дээр та юу хэлэх вэ? - Хуулин дээр ганцхан заалт байгаа. УИХ-ын гишүүн гэмт хэргийн үйлдэл дээрээ баригдаад үүний дагаа асуудал орж ирвэл Халдашгүй байдлын дэд хороогоор эрхийг нь түдгэлзүүлэх эсэхийг нь шийдвэрлэнэ. Бусад нь Хууль зүйн байнгын хорооны асуудал. Бид хуулинд ганцхан заалттай. Энэ заалтын дагуу асуудал тавигдвал ярина. Түүнээс өөр асуудал тавибал бидэнд хэлэцэх эрх зүйн орчин байхгүй.
- Х.Нарахүү гишүүнд АТГ-аас эрүүгийн хэрэг үүсгэн шалгаж байгаа. Дээрх асуудлаар танай хороонд прокорурын зүгээс санал ирүүлсэн үү? - Ирээгүй. Д.Дондогийн асуудлаар ч гэсэн манайд албан бичиг ирээгүй.
- Халдашгүй байдлын хороонд мэдэгдэлгүйгээр УИХ-ын гишүүдийг шалгах эрх хуулийн байгууллагад бий юу? - Тэрийг би сайн мэдэхгүй байна. Би хуульч хүн биш шүү дээ. Д.Дондог гишүүний асуудал Хууль зүйн байнгын хороон дээр хоёр удаа ирээд буцсан. Манай Халдашгүй байдлын хороонд ирээгүй. Х.Наранхүү гишүүний асуудал ч манай хороонд ирээгүй. Учир нь манай хороогоор хэлэлцдэг заалтад хамрагдах зүйл байгаагүй.
- УИХ-ын гишүүний халдашгүй байдал гэдэг зүйл байхгүй боллоо гэдэг зүйлийг зарим УИХ-ын гишүүд яриж байгаа. Та энэ асуудлыг хариуцсан хүний нэгийн хувьд байр сууриа илэрхийлээч? - Байгаа. Халдашгүй байдалдаа халдуулсан гишүүн хэн байгаа юм бэ. Бүгдийнх нь халдашгүй байдлыг хангаж, бүрэн бүтнээрээ байгаа.
- Эрүүгийн хэрэгт татагдсан УИХ-ын гишүүд хэд хэдэн удаа гарлаа. Үүнийг л тэгж тайлбарлаад байх шиг байна? - Тэрийг би мэдэхгүй. Энэ бол хуулийнханы асуудал.
С. Заяа
Уншиж байна |