Улаанбаатар
Италийн 40 гаруй компани 15 гаруй сая долларын хөрөнгө оруулжээ
2011-10-20

Монгол Улсын Гадаадын  хөрөнгө оруулалтын газар, Итали Улсын аж үйлдвэрийн холбоо, Ломбарди муж дахь “Ассоломбарда” байгууллага, Милан хотын Худалдаа аж үйлдвэрийн танхимын “Промос” агентлаг, Итали Монголын бизнесийн зөвлөл, Италийн хөрөнгийн биржүүд хамтран уг форумыг зохион байгуулсан юм. Монгол Улсын Ерөнхийлөгч Ц.Элбэгдорж Бүгд Найрамдах Итали Улсад хийж байгаа албан ёсны айлчлалынхаа хүрээнд Италийн Милан хотноо  аравдугаар сарын 19-нд болсон “Монгол-Италийн бизнес форумд оролцлоо. Ерөнхийлөгч Ц.Элбэгдорж бизнес форумыг нээж үг хэллээ. Тэрээр хэлэхдээ, Итали хэлэнд “Сарнай бүр заавал дэлгэрдэг” гэсэн зүйр үг байдаг. Энэ нь монгол хэлний “Санаж явбал бүтнэ” гэсэн зүйр үгтэй дүйцэх юм.  Түүхэн уламжлалт харилцаатай манай хоёр орны хувьд төстэй зүйл бий. Бид аль аль нь нэгэн цагт дэлхийн хүчирхэг эзэнт гүрнийг байгуулж байсан, хосгүй гайхамшигтай соёл иргэншлийг бий болгосон. Хойч үе нь энэхүү түүхээрээ бахархдаг. Би Ромд айлчлах үеэрээ Ватиканы нууц архивт орж манай хоёр орон эртнээс харилцаа холбоотой байсныг гэрчлэх түүхэн баримт бичгүүдийг үзлээ. Монголын эзэнт гүрний их хаадууд, Ромын эзэнт гүрний хаад, Папууд хоорондоо харилцаж байсан тэдгээр захидлуудад худалдаа арилжаа хийх, элч төлөөлөгч солилцох тухай бичсэн байна. Өнөөдөр та бүхэн “хамтран дэлхийн зах зээлд гарья” гэж хэлж байгааг би бүрэн дүүрэн дэмжиж байна. Монгол бол дэлхийн хамгийн хурдан хөгжиж байгаа эдийн засаг бүхий улстай хамгийн урт хилээр хиллэдэг, өргөн уудам газар нутагтай, олон сая малтай, хөдөө аж ахуйн асар их боломжтой орон. Өвөг дээдсийнхээ санаж бодож явсныг бүтээх боломж бидэнд бүрэн дүүрэн байна” гэсэн юм. Энэхүү бизнес форумд Италийн талаас үйлдвэрлэлийн машин тоног төхөөрөмж, нүүрс, төмөр, уул уурхайн үйлдвэрлэл, гадаад дотоод худалдаа, хөрөнгө оруулалт, санхүүгийн салбарт үйл ажиллагаа явуулдаг 50 гаруй бизнес эрхлэгчид, монголын талаас 20 гаруй аж ахуйн нэгж, байгууллага компанийн төлөөлөл оролцлоо. Хоёр орны худалдаа, хөрөнгө оруулалтын хамтын ажиллагааг өргөжүүлэх, Монгол Улсын хөрөнгө оруулалтын эрх зүйн орчныг Италийн бизнес эрхлэгч, хөрөнгө оруулагчдад сурталчлах, хоёр улсын бизнес эрхлэгчдийн хооронд ажил хэргийн шууд харилцаа тогтоож, хамтран ажиллах түншээ олоход энэхүү форум үр дүнгээ өгнө гэдэгт итгэж байгаагаа форумд оролцогчид илэрхийлж байлаа. Милан дахь Итали-Монголын бизнес зөвлөлийг Италийн парламентын гишүүн, алдарт загвар зохион бүтээгч Ж. Версаче \Versace\-ийн  дүү Санте Версаче тэргүүлж байна. Тэрээр мөн бизнес форумд оролцож үг хэлсэн. Хоёр орны хооронд гүүр болж байгаа олон иргэд, албаны хүмүүсийн хүчин чармайлтаар Италид Монголын Элчин сайдын яам  нээгдлээ, одоо дараагийн хүчин чармайлт Улаанбаатарт Италийн Элчин сайдын яам нээгдэхэд чиглэгдэх болно гэсэн юм.    Италийн хөрөнгө оруулагчдын хувьд, монгол орны нээлттэй эдийн засаг, хувь хүний эрх, эрх чөлөө,  хурдацтай хөгжиж байгаа хөдөө аж ахуйн салбар, өргөн уудам газар нутаг, дэлхийн хүчирхэг эдийн засаг бүхий хөрш орон, залуу чадварлаг боловсон хүчин, хүн амынх нь нээлттэй зочломтгой чанар зэрэг олон хүчин зүйлүүдийг  “хөрөнгө оруулж хамтран ажиллах” боломж гэж харж байгаагаа илэрхийлж байлаа. Манай улсад италийн 40 гаруй компани хөрөнгө оруулж үйлдвэрлэл үйлчилгээ явуулж байна. Нийт хөрөнгө оруулалтын хэмжээ нь 15 гаруй сая долларын хэмжээнд хүрчээ.
Shuud.mn
Сонин хачин