Гладиаторын тулаан болдог байсан цэнгэлдэх хүрээлэнтэй танилцжээ
2011-10-20

Италийн хамгийн том, хамгийн их хүн амтай, хамгийн их жуулчид хүлээж авдаг Ром хот тэр чигээрээ түүх соёлын хосгүй өв ажээ. 2500 гаруй жилийн настай, 3.7 сая хүн амтай энэ хотод нэгэн цагт хүчирхэг байсан эзэнт гүрний соёл, иргэншлийг харуулах олон түүх соёлын дурсгалт газрууд бий. Монгол Улсын Ерөнхийлөгч Ц.Элбэгдорж айлчлалынхаа үеэр заримтай нь танилцав. Тухайлбал,  жуулчдын зорьж очдог газруудын нэг бол  манай эриний 72-80 онд барьсан алдарт Колоссеум хэмээх эртний цэнгэлдэх хүрээлэн юм. 55 мянган суудалтай энэ цэнгэлдэх хүрээлэнд эртний ромчууд Гладиаторын тулаан, цэргийн сургуулилт, амьтдын тулалдаан зэргийг үздэг байжээ. Харин дундад зууны үеэс үзвэрийн зориулалтаар ашиглахаа больж, орон сууц, гар урлал, үйлдвэрлэл, сүм хийдийн зориулалтаар ашиглах болсон байна. Өнөөдөр Колессеумыг Ромын эзэнт гүрний хамгийн том байгууламж байсан хэмээн зүй ёсоор хүлээн зөвшөөрдөг юм. Ромчууд одоо ч “Колессеум сүндэрлэн байгаа цагт Ром оршин тогтносоор байх болно” гэж дуулдаг ажээ. Ром хотын бас нэгэн билэг тэмдэг бол Тревийн усан оргилуур юм. 26 метр өндөр, 20 метр өргөн  энэхүү дэлхийн хамгийн алдартай усан оргилуур 1735-1762 онд баригджээ. Ромын  генерал Агрипагийн цэргүүдийг харангадаж үхэхээс аварсан цэнгэг ус нь одоо ч Ром хотод дахин ирэхийг хүссэн жуулчдын заавал амсдаг ус байсаар байна. Дэлхий дээрх хамгийн том сүмүүдийн нэг болох Ватиканы сүм нь уран барилгын гайхамшиг юм. 135 метр өндөр, зүйдэлгүй гантиг чулуугаар баганууды нь босгосон, зөвхөн шигтгэмэл чулуугаар библийн түүхийг зураглаж үзүүлсэн ийм сүм дэлхийн өөр хаана ч байхгүй билээ. Энэ мэт түүх, соёлын дурсгалт газрууд олонтой Ром хот дэлхийн хамгийн их жуулчин хүлээж авсан  хотоор шалгарчээ.  
Shuud.mn
Сонин хачин