Долоон улсын 60 гаруй ажиглагч ирээд байна
2012-06-27

Монгол Улсын Сонгуулийн Ерөнхий Хорооны дарга Н.Лувсанжав УИХ-ын 2012 оны сонгуулийг ажиглахаар манай оронд хүрэлцэн ирсэн БНСУ-ын Кёнги аймгийн сонгуулийн комиссын  газрын Ерөнхий захирал ноён Сон Жон Жун тэргүүтэй төлөөлөгчдийг өнөөдөр хүлээн авч уулзлаа. Уулзалтын үеэр СЕХ-ны дарга Н.Лувсанжав УИХ-ын энэ удаагийн сонгуулийн онцлог, бэлтгэл ажлын талаар танилцуулахдаа, сонгуулийн хууль шинэчлэгдсний зэрэгцээ бүртгэх, санал тоолох автоматжуулсан системийг ашиглах, гадаадад байгаа монгол иргэдийн санал авах, парламентын болон нийслэлийн иргэдийн төлөөлөгчдийн Хурлын сонгуулийг хамтад нь зохион байгуулж явуулах зэрэг шинэ бөгөөд анх удаа хийгдэж байгаа олон зүйл байгааг онцлож байлаа. Үүнтэй холбоотой Монгол Улсын Сонгуулийн Ерөнхий Хорооноос иргэд сонгогчдод шинэ мэдээлэл хүргэх асуудалд ихээхэн анхаарч, энэ хүрээнд сурталчилгааны олон хэлбэрийг ашиглаж ажиллаж байгаагаа  дурдлаа.  Сонгуулийн дараа  алдсан, оносоноо бодитой үнэлж дүгнэж улмаар  цаашид сонгуулиа улам боловсронгуй болгоход анхаарч ажиллах болно гэлээ. Тэрбээр хоёр орны сонгуулийн байгууллагуудын хамтын ажиллагааны түвшинг өндөр үнэлээд тэдгээр нь олон жилийн түншлэл, харилцааны туршлагатайг онцлон тэмдэглэхийн сацуу  Хамтран ажиллах баримт бичгийн үзэл санааны дагуу хамтын ажиллагаа хөгжиж байгаад сэтгэл ханамжтай байгаагаа илэрхийллээ. Монгол Улсын Сонгуулийн Ерөнхий Хороо парламентын сонгуульдаа автоматжуулсан систем ашиглах гэж байгааг сонсоод гайхаж биширлээ. Энэ бол их хэрэгтэй зүйл тул Танай туршлагыг их сонирхож байна гэдгээ БНСУ-ын сонгуулийн ажиглагчдын багийн ахлагч онцлон тэмдэглэв. Кёнги аймаг нь есөн сая сонгогчидтой бөгөөд  байнгын ажиллагаатай  сонгуулийн байгууллагад нь 380 хүн ажилладаг  ажээ. Өнөөдрийн байдлаар Монгол Улсын Их Хурлын сонгуулийг ажиглахаар долоон улсын 60 гаруй ажиглагчид Монгол Улсын Сонгуулийн Ерөнхий Хороонд бүртгүүлж ажиглагчийн үнэмлэх аваад байна. У.Жигүүр
Shuud.mn
Сонин хачин