Цагдаагийн Ерөнхий газрын дарга, Дотоодын цэргийн командлагч, хошууч генерал Д.Сандаг-Очир Үндэсний Их баяр наадмын хүчит бөхийн барилдаанд үзүүрлэж Монгол Улсын Гарьд цол хүртсэн НЦГ-ын Хөдөлгөөнт эргүүлийн газрын эргүүлийн ахлах офицер, цагдаагийн дэд хурандаа Д.Рагчаа, тав давж Монгол Улсын Начин цолоо бататгаж, Монгол Улсын Ерөнхийлөгчийн зарлигаар "Өсөх идэр начин" чимэг хүртсэн Чингэлтэй дүүргийн цагдаагийн хэлтсийн цагдаа, цагдаагийн дэслэгч Ш.Жаргалсайхан нарыг хүлээн авч уулзан баяр хүргэжээ.
ЦЕГ-ын даргын тушаалаар Монгол Улсын Гарьд цол хүртсэн цагдаагийн дэд хурандаа Д.Рагчааг дурсгалын сэлэм, мөнгөн шагналаар, "Өсөх идэр начин" чимэг хүртсэн цагдаагийн дэслэгч Ш.Жаргалсайханг цагдаагийн ахлах дэслэгч цолоор шагнасан байна. Мөн цагдаа, дотоодын цэргийн бөхийн галын дасгалжуулагч, цагдаагийн хошууч Ц.Мягмарсүрэн, Х.Амараа нарт цагдаагийн дэд хурандаа цол олгожээ. Түүнчлэн Үндэсний Их баяр наадмын хүчит бөхийн барилдаанд амжилттай барилдсан цагдаагийн хошууч, улсын гарьд Н.Ганбаатар, цагдаагийн ахмад, улсын харцага А.Цацабшир, ахмад, улсын харцага Т.Амартүвшин, цагдаагийн ахлах дэслэгч, улсын начин Ш.Уламбаяр, цагдаагийн дэслэгч, улсын начин Ж.Оргил, Л.Нямсүрэн нарыг шагнаж урамшуулсан байна.
Д.Цэцэг