Энэтхэг, Мьянмар улсуудын дунд орших Бангладеш 152 сая хүн амтай, дэлхийн хамгийн их хүн амтай найм дахь орон билээ. Гэхдээ одоог хүртэл нэг ч медаль авч байгаагүй гэвэл та итгэх үү?
Хүн амын тоо их байх нь медаль авах боломжийг нэмэгдүүлнэ хэмээх логик амьдрал дээр тийм ч үнэн байдаггүй бололтой. Олон улсын Олимпийн хороонд 204 гишүүн орон байдгаас 80 нь мөн л хэзээ ч медаль авч байгаагүй аж. Үүнд хүн амынхаа тоогоор 25-д бичигддэг Мьянмар, 45-д бичигддэг Непал багтаж байна.
Харин 195-д бичигддэг Тонга улс нэг мөнгө, 181-т бичигддэг Барбадос нэг хүрэл медальтай бол 178-д бичигддэг Исланд аль альнаас нь хоёрыг авсан байна. 177-д бичигддэг Багамын арал нийт арван ч медаль авч, дөрөв нь бүр алт байх юм.
Хамгийн сонирхолтой нь Бангладешийн хувьд медаль авч байгаагүйгээр барахгүй, хэзээ ч олимпийн шаардлага хангах тамирчин гарч ирж байгаагүй байна.
Харин 1984 оноос хойш “wildcard” хэмээх эрх авсан, болзол хангаагүй тамирчид тэмцээнд оролцох боломжтой болсон аж.
Ийм эрхийн дагуу Бангладешийн харваа, гимнастик, мэргэн буудлага, усанд сэлэлт гэсэн дөрвөн төрлүүдийн тамирчид нээлтийн арга хэмжээнд оролцохоор болсон байна.
Ц.Мишээл