-Хэдийгээр тангарагаа өргөх вэ?

-Манай “Шударга ёс” эвслийн бүлгийн хуралдааны үеэр авсан мэдээллээр  нэр дэвшигч Ц.Цолмон бид хоёр   УИХ-ын чуулганы эхний хуралдаанаар  тангараг өргөхөөр болж байна. “Шударга ёс” эвслээс бид гурав  намын листээр сонгуульд нэр дэвшсэн учраас  намын удирдах зөвлөлийн байр суурийг сонсох ёстой. Цаашид  улс төрд ажиллах учраас  зөв жишиг тогтоох хэрэгтэй  гэдэг утгаараа хүлээлттэй байлаа.

-МАХН-ын дарга Н.Энхбаярын хувьд  дахин Үндсэн хуулийн цэцэд хандах болсон байна. Гомдол гаргасан тохиолдолд маргаан үүсэх боломжтой юу?

- Үндсэн  хуулийн Цэцийн өмнөөс  маргаан үүсэх, эсхүл үүсэхгүй гэсэн байр суурийг би хэлэх боломжгүй.  Хуульчийн  хувьд  Үндсэн хуулийн Цэцэд гомдол гаргах талаар зөвлөгөө өгч байсан. Сонгуулийн ерөнхий хороо  МАХН-ын гишүүдийн,  шүүхийн өмнөөс  шийдвэр гаргасанд бид гайхаж байгаа. МАХН-ын дарга Н.Энхбаярыг  нэр дэвшигчээр бүртгэхээс татгалзсан нь  шүүгчийн өмнөөс  гаргасан шийдвэр  гэж үзэж байна. Энэ бол  улс төрийн зорилготой хэлмэгдүүлэлт учраас эл үйлдлийг  зогсоох хүртэл хуулийн хүрээнд  бид тууштай тэмцэх бодолтой байна.

-Чуулганы үеэр МАН-ын гаргасан шийдвэрт ямар тайлбар хэлэх вэ?

-УИХ дахь МАН-ын зүгээс улс төрийн  соёлгүй загнасан. Учир нь хуралд орох эсэх асуудал МАН-ын үзэмжийн асуудал. Анхдугаар чуулган хууль ёсны юу,  үгүй юу гэдэгт МАН  өөрийн байр сууриа илэрхийлэх ёсгүй. Тухайн үед УИХ дахь  бүлгүүд байгуулагдаагүй байхад аливаа гаргасан шийдвэр өөрсдийнх нь байр суурь. Уг нь МАН хуралд оролцоод өөрсдийн  байр сууриа илэрхийлээд шаардлагатай гэж үзвэл хуралдааныг  орхиж гарч болно. Энэ тохиолдолд МАН хурал хаяж гарсан гэдэг утгаараа тус намыг  хүлээх үү, эсхүл хүлээхгүй юу гэсэн яриа байж болно. Гэтэл МАН анхдугаар чуулганд хэвийн оролцож  тангаргаа өргөсөн мөртлөө чуулганы үргэлжлэлд оролцохгүй гэж байгаа нь ойлгомжгүй. Тэгэхээр МАН гэдэг бол төрийн үйл ажиллагаанд шууд оролцох эрх мэдэлгүй. Харин МАН  гишүүдээрээ дамжуулж төрийн эрх мэдэлд оролцох үүрэгтэй. Иймд МАН чуулганы хуралдаанд өөрсдийн хүсэлтээр оролцоогүйн төлөө гомдол гаргах нь  утгаггүй юм.  Хуралд  оролцохгүй гэсэн мөртлөө  гомдол гаргаж байгаа нь буруу. Би хуульч хүнийнхээ хувьд  харахдаа тухайн үеийн хуралдааны үед  Ерөнхийлөгчийн байр суурь маш чухал байсан. Яагаад гэвэл анхдугаар чуулганыг хуралдуулах үүрэг нь Ерөнхийлөгчид бий. Тиймээс хуралд оролцохгүй байгаа эсхүл хурлаа зохион байгуулах гэж байгаа талуудад  чиглэл өгөх үүрэгтэй байсан гэж бодож байна.

Н.Түвшин