“Стриптиз блюз” жүжигт нүцгэлэн эрчүүдийг хуйлруулж явснаа бодвол жүжигчин Р.Анхням өдгөө намба суусан даруухан эмэгтэй болж. Гэхдээ л түүний нүцгэн бие, эротик үйлдэл кино дэлгэцнээ цөөнгүй харагддаг.

Олны танил эрчүүдтэй амраглаж явснаа “Амархан дурладаг шигээ амархан хагацдаг” хэмээн тайлбарласан жүжигчин бүсгүй сүүлийн үед үнэт чулуу шигтгэсэн сүйн бөгжөөр гангарч эхэллээ. Энд тэндхийн арга хэмжээнд оролцож, элдэв загварын хувцас өмслөө ч мөнөөх бөгжөө огт солихгүй. Бас царайлаг бүсгүйн хуруунд бөгж зүүж, гэрлэхийг зөвшөөрүүлсэн азтай залуугаа ч нуугаад сүйд болох нь гайхалтай.

Ирэх намар болох хуримын ёслолоос өмнө сүйт залуугаа “гэрэлд цохиулахгүй” гэж хичээсэн Р.Анхнямын ч зөв байж мэднэ. Тэгэхгүй бол хувийн амьдрал нь нэг л мэдэхэд дэлгэсэн ном шиг ил болохыг үгүйсгэх газаргүй. Аягүйдвэл, хайртай залуугийнх нь хамаг нууц илэрчихвэл  хагацаж салах аюулд унана гэж эмээсэн биз.

Харин жүжигчин бүсгүйн ингэтлээ нууцалж буй “дурлалын бурхан” нь хэн болохыг сониучирхсан хүн олон байгаа.Бүр олны танил, чинээлэг эрхмүүдийн нэр ч энэ тааварт нь багтсан аж.  Юутай ч тэрбээр энэ бүхнийг тоолгүй нөхөрт гарахаар яарч, хэдэн жилийн өмнө ээждээ өгсөн “Ачийг тань төрүүлж, ажилтай болгоно оо” гэсэн амлалтаа тун удахгүй биелүүлэх нь.