Нийслэлийн иргэдийн төлөөлөгчдийн хурлын ээлжит бус II хурал яг одоо үргэлжилж байна. Үдээс өмнө хуралдаанаар хуралдааны дэгд өөрчлөлт оруулах тухай төслийг хэлэлцэн төлөөлөгчдийн 100 хувийн саналаар батласан бол НИТХ-ын дотоод зохион байгуулалтай холбоотой хэд хэдэн асуудлыг хэлэлцэн баталжээ.Үүний дараа хурлын дараалал ёсоор замын хөдөлгөөний ачаалалыг бууруулах зарим арга хэмжээний тухай хэлэлцсэн.
Улаанбаатар хотын тээврийн менежментийг сайжруулах талаархи төслийг Нийслэлийн засаг дарга бөгөөд Улаанбаатар хотын захирагч Э.Бат-Үүл төлөөлөгчдөд танилцууллаа. Энэхүү төслийг өнгөрсөн долоо хоногийн даваа гаригт Нийслэлийн иргэний танхимаар хэлэлцүүлсэн юм. Нийслэл Улаанбаатар хотын авто замын засварын ажлаас үүдэн хотын замын хөдөлгөөн удааширч, түгжрэл саатал гарах болсон нь иргэдийг ихээхэн бухимдуулж байгаа бөгөөд их дээд сургууль болон ерөнхий боловсролын сургуулийн хичээлийн шинэ жил эхлэх цаг хугацаа нь ойртож байна.
Энэ үеэр нийслэлийн иргэд, тээврийн хэрэгслийн хөдөлгөөний урсгал нэмэгддэг. Тиймээс автозамын хөдөлгөөний зохион байгуулалтыг сайжруулах, түгжрэлийг бууруулах дэс дараатай арга хэмжээг яаралтай авч хэрэгжүүлэх шаардлага тулгарч байгаа юм. Тиймээс мэргэжлийн байгууллагуудын хийсэн судалгаа, тооцоо, төлөвлөлт саналыг үндэслэн автозамын ачааллыг зохицуулах нь зайлшгүй болоод байгааг юм. Энэ төслийг танилцуулсаны дараа төлөөлөгчид асуулт асууж, холбогдох албаны хүмүүсээс тодорхой тайлбар авсан. Яг одоо замын хөдөлгөөний ачааллыг бууруулах арга хэмжээний тухай хэлэлцэн батлахаар хуралдаж байна.
Д.Цэцэг