Нийслэлийн Засаг дарга бөгөөд Улаанбаатар хотын захирагч Э.Бат-Үүл замын ачааллыг буруулах зорилгоор дараахь захирамжийг гаргаад байна. Нэг. Улаанбаатар хотын замын хөдөлгөөний ачааллыг зохицуулах зорилгоор 2012 оны 08 дугаар сарын 27-ноос 10 дугаар сарын 27-ныг хүртэлх хугацаанд дараахь арга хэмжээг авч хэрэгжүүлэхийг Замын цагдаагийн газар /Х.Энхжаргал/-т даалгасугай. 1.1. Нийслэлийн Иргэдийн Төлөөлөгчдийн Хурлаас нийслэл Улаанбаатар хотын зарим замуудад тогтоосон хязгаарлалтын бүсэд тээврийн хэрэгслийг улсын дугаарын ялгавартайгаар замын хөдөлгөөнд оролцуулж хяналт тавих; 1.2. Автозамын хэт ачааллыг зохицуулах ажилд 150 туслах ажилтныг авч ажиллуулах, мэргэжлийн удирдлагаар хангах. Хоёр. Энхтайваны өргөн чөлөө замын 25 дугаар эмийн сангийн уулзвараас Зүүн 4 замын уулзвар хүртэлх хэсэгт зорчих хэсгийн 1 дүгээр эгнээгээр 2012 оны 08 дугаар сарын 27-ны өдрөөс эхлэн зөвхөн нийтийн тээврийн үйлчилгээний автобус, троллейбусыг зорчуулах, нийтийн тээврийн үйлчилгээний замналыг боловсронгуй болгох зохион байгуулалтын арга хэмжээ авахыг Нийслэлийн Нийтийн тээврийн газар /П.Наранцэцэг/-т, зорчих хэсгийн 1 дүгээр эгнээнд тэмдэг, тэмдэглэл хийх, цаашид тусгаарлах хашлага тавих зураг төслийг боловсруулах, шаардагдах хөрөнгийн тооцоог гаргаж 2013 оны нийслэлийн төсвийн төсөлд тусгуулахыг Нийслэлийн Авто замын газар /Д.Од/-т, хяналт тавьж ажиллахыг Замын цагдаагийн газар /Х.Энхжаргал/-т тус тус даалгасугай. Гурав. 2012 оны 8 дугаар сарын 27-ноос 10 дугаар сарын 28-ны өдөр хүртэлх хугацаанд Худалдаа үйлчилгээний томоохон төв, захын үйлчилгээний цагийн хуваарьт нэгдүгээр хавсралтаар өөрчлөлт оруулан баталж, мөрдүүлж ажиллахыг аж ахуйн нэгж, байгууллагын удирдлагуудад, тэдний үйл ажиллагаанд нь хяналт тавьж ажиллахыг Нийслэлийн Мэргэжлийн хяналтын газар /Л.Бямбасүрэн/-т, Захирагчийн ажлын албаны Хүнс, худалдаа, үйлчилгээний хэлтэс /Ж.Долгормаа/-т тус тус үүрэг болгосугай. Дөрөв. Төрийн болон үйлчилгээний байгууллагуудын гаднах авто зогсоолын талбайн 80-аас доошгүй хувийг үйлчлүүлэгчдийн автомашины зогсоолоор ашиглах нөхцөл бүрдүүлэхийг дүүргүүдийн Засаг дарга нар, байгууллагын удирдлагуудад, зогсоолын талбайн ашиглалтад хяналт тавьж ажиллахыг Замын цагдаагийн газар /Х.Энхжаргал/, Нийслэлийн цагдаагийн газар /Ө.Энхтөр/-т тус тус даалгасугай. Тав. Замын хөдөлгөөнд саад учруулсан тээврийн хэрэгслийг тусгай зориулалтын автомашинаар ачиж зөөвөрлөх үйл ажиллагааг зохион байгуулахыг Замын хөдөлгөөний удирдлагын төв /Л.Батцоож/-д даалгасугай. Зургаа. Улаанбаатар төмөр замыг хот орчим, хотын доторх зорчигч тээврийн үйлчилгээнд ашиглах боломжийг Төмөр замын асуудал эрхэлсэн байгууллагатай хамтран судалж, санал боловсруулж, 2012 оны 10 дугаар сарын 20-ны дотор танилцуулахыг Нийслэлийн Засаг даргын Барилга, хот байгуулалт, дэд бүтцийн асуудал хариуцсан орлогч /Н.Гантөмөр/-д даалгасугай. Долоо. Нийслэлийн Засаг даргын Нийгмийн хөгжлийн асуудал хариуцсан орлогч /Ц.Баатархүү/-д, Нийслэлийн Боловсролын газар /Ц.Отгонбагана/-т тус тус ДААЛГАХ нь: 7.1.Ерөнхий боловсролын сургуулийн хичээл болон хүүхдийн цэцэрлэгүүдийн эхлэх болон тарах цагийн хуваарьт өөрчлөлт оруулах арга хэмжээ авах; 7.2. Хоёрдугаар хавсралтанд дурьдсан сургуулиудын сурагчдыг нэгдсэн зохион байгуулалттай тээвэрлүүлэх ажлыг зохион байгуулах; 7.3. Зам тээврийн осол, хэргээс урьдчилан сэргийлж сурагчдын цүнх, хувцсыг гэрэл ойлгогчтой болгох ажлыг зохион байгуулах. Найм. Сургууль, цэцэрлэгийн ойролцоох автозамуудад хурд сааруулагч хийх, тэмдэг байрлуулах ажлын жагсаалтыг гуравдугаар хавсралтаар баталж, 2012 оны 09 дүгээр сарын 15-ны дотор хийж гүйцэтгэхийг Нийслэлийн Авто замын газар /Д.Од/-т, хяналт тавьж ажиллахыг Замын цагдаагийн газар /Х.Энхжаргал/-т тус тус даалгасугай. Ес. Орон сууцны хороолол доторх автомашины хөдөлгөөний орц, гарцыг хаасан хашаа, хаалтыг чөлөөлөх “Хашаа” арга хэмжээг эрчимжүүлж ажиллахыг Нийслэлийн Газрын алба /М.Буяндэлгэр/-нд даалгасугай. Арав. Автомашины төлбөртэй зогсоол байгуулах ажлыг иргэн, аж ахуйн нэгж, байгууллагын хөрөнгө оруулалтаар хийлгэх журмыг боловсруулан батлуулж, хэрэгжилтийг зохион байгуулж ажиллахыг Нийслэлийн Засаг даргын Барилга, хот байгуулалт, дэд бүтцийн асуудал хариуцсан орлогч /Н.Гантөмөр/-д үүрэг болгосугай. Арван нэг. Замын хөдөлгөөний ачааллыг зохицуулах талаар авч хэрэгжүүлж буй ажлыг олон нийтэд мэдээлэх, сурталчилгааны самбаруудыг ашиглан улсын дугаараар хөдөлгөөнд оролцох хязгаарлалтын талаархи мэдээллийг байршуулах, замын хөдөлгөөний нөхцөл байдлын мэдээллийг хэвлэл, радио, телевизээр сурталчилах ажлыг шуурхай зохион байгуулахыг Улаанбаатар хотын Ерөнхий менежер /Ч.Бат/, Замын цагдаагийн газар /Х.Энхжаргал/, Нийслэлийн Нийтийн тээврийн газар /П.Наранцэцэг/, Замын хөдөлгөөний удирдлагын төв /Л.Батцоож/, Нийслэлийн Засаг даргын Тамгын газрын Хэвлэл, мэдээллийн алба /н.Оюунбат/-нд тус тус даалгасугай. Арван хоёр. Нийтийн тээврийн үйлчилгээний байгууллагуудын гэрээний үүрэг, стандартын шаардлагыг хангуулах, сахилга хариуцлагыг дээшлүүлэх, үйлчилгээний чанар соёлыг сайжруулах ажлыг зохион байгуулж ажиллахыг Нийслэлийн Нийтийн тээврийн газар /П.Наранцэцэг/-т даалгасугай. Арван гурав. Нийслэл хотын замын хөдөлгөөний ачааллыг зохицуулахад шаардагдах 1 тэрбум 778.2 сая төгрөгийг Нийслэлийн төсвийн давсан орлогын эх үүсвэрээс санхүүжүүлэхийг Нийслэлийн Засаг даргын Тамгын газрын Санхүү, төрийн сангийн хэлтэс /Э.Ганхүү/-т зөвшөөрсүгэй. Арван дөрөв.Энэ захирамжийн хэрэгжилтийг зохион байгуулах, нэгдсэн удирдлагаар хангах үүрэг бүхий Ажлын хэсгийг дөрөвдүгээр хавсралтаар баталж, гүйцэтгэл үр дүнг 2012 оны 11 дүгээр сарын 1-ний өдрийн дотор танилцуулахыг Ажлын хэсэг /Н.Гантөмөр/-т үүрэг болгосугай. ҮЙЛЧИЛГЭЭНИЙ ЦАГИЙН ХУВААРЬТ ӨӨРЧЛӨЛТ ОРОХ ХУДАЛДААНЫ ТӨВҮҮД

№	Худалдаа үйлчилгээний газруудын нэр	Аж ахуйн нэгжийн нэр	Байршил	Амрах өдөр	Ажиллах цаг
					Эхлэх цаг	Дуусах цаг
1.	Нарантуул ОУХТөв	Нарантуул ХХК	БЗД 14-р хороо	Мягмар	12:00	21:00
2.	Өгөөмөр	Даймонд ХХК	БЗД 14-р хороо	Лхагва	12:00	21:00
3.	Сандей	Сандей плаза ХХК	БЗД 14-р хороо	Даваа	10:00	22:00
4.	Цайз зах	-	БЗД 19-р хороо	Лхагва	10:00	19:00
5.	Цайз захаас – Да хүрээ – Шархадны зам дагуух үйлчилгээ	-	БЗД 14, 19 дүгээр хороо	Даваа	14:00	22:00
6.	Меркури худалдааны төв	Гурван эвтэн ХХК	СБД 3-р хороо	Даваа	11:00	20:00
7.	Хар хорин зах	Чингэс трейд	БГД 20-хороо	Даваа	07:00	15:00
8.	Бөмбөгөр – 1	Эрдэнэбулган ХХК	ЧД 2-р хороо	Даваа	07:00	15:00
9.	Содон төв	Эрдэнэбулган ХХК	ЧД 2-р хороо	Пүрэв	11:00	20:00

СУРАГЧДЫГ НЭГДСЭН ЗОХИОН БАЙГУУЛЛАЛТТАЙГААР ТЭЭВЭРЛЭХ ШААРДЛАГАТАЙ СУРГУУЛИУДЫН ЖАГСААЛТ

ДҮҮРЭГ	Д/д	СУРГУУЛЬ
Чингэлтэй	1	“Олонлог” дунд сургууль
	2	“Диана” сургууль
Баянзүрх	3	Орос 14-р сургууль
	4	Плехановын нэрэмжит сургууль
	5	“Эрэл” сургууль
	6	“Шинэ Монгол” сургууль
Баянгол	7	“Радуга” сургууль
	8	38-р сургууль
Хан-уул	9	“Американ” сургууль
	10	Internatinoal school
Сухбаатар	11	1-р дунд сургууль
	12	“Сант” сургууль
	13	“Орчлон” сургууль
	14	Монгол Энэтхэгийн хамтарсан сургууль
	15	Монгол Орос ын хамтарсан сургууль
	16	Улаанбаатар Элит Сургууль
	17	Hobby сургууль
	18	“Шинэ үе” сургууль

СУРГУУЛЬ, ЦЭЦЭРЛЭГИЙН ОЙРОЛЦООХ АВТОЗАМУУДАД ХУРД СААРУУЛАГЧ ХИЙХ, ТЭМДЭГ БАЙРЛУУЛАХ АЖЛЫН ЖАГСААЛТ

№	Байршил	Тоо ширхэг	Өртөг
1	Дарь-Эхийн замд 102-р сургуулийн орчимд	2	8,429,000
2	Энхтайваны өргөн чөлөө, 14-р сургуулийн хойд замд	2	19,334,803
3	Дамдинсүрэнгийн гудамж, 15-р байрны урд замд	2	6,610,483
4	БЗД-ийн 4-р хорооны хорооллын доторхи замд	2	4,792,723
5	Амгалангийн зам, "Оргил" худалдааны төвийн хойд замд	2	12,972,643
6	Хүүхдийн хаяг тогтоох газрын зүүн замд	3	9,791,563
7	Чимэд-Осорын гудамж, 65-р цэцэрлэгийн зүүн замд	2	6,610,483
8	3,4-р хороолол, "Танан" хүнсний захын урд зам	2	6,610,483
9	Төмөр зөмын цагдаагийн хэлтсийн зүүн замд	2	6,610,483
10	Хасбаатарын гудамж, 13-р сургуулийн арын замд	2	6,610,483
11	19-р сургуулийн хойд зам, "Энхжин" худалдааны төвийн урд замд	2	6,610,483
12	СБД, 7-н буудлаас 32-н тойрог, 7-н буудлаас цагдаагийн пост хүрэх замд	6	14,790,403
Нийт		29	109,774,033.00