УИХ дахь МАН-ын гишүүд өнөөдөр ээлжит хуралдаанынхаа дараа сэтгүүлчдэд мэдээлэл хийлээ. УИХ-ын гишүүн Н.Энхболдын өгч буй мэдээллээр маргааш ээлжит бус чуулганаар хэлэлцэх Орон нутгийн сонгуулийн тухай хуулийн төсөлтэй тус намын гишүүд танилцаж хурлаараа хэлэлцжээ. Ингээд ИТХ-ын төлөөлөгчийн гуравны нэг хүртэлхийг намын жагсаалтаар үлдсэн төлөөлөгч тойргийн системээр өрсөлдөхөөр заагаад байгаа нь буруу, улстөржсөн, намжсан түүнээс харьяат байлгах гэсэн буруу алхам гэж үзсэн байна.
Тодруулбал, Орон нутгийн сонгуулийн тухай хуульд сонгогч сонгууль өгөх нь үүрэг гэж заасан, энэ нь Үндсэн хуульд заасан хэм хэмжээг давсан заалт гэнэ. Мөн орон нутгийн сонгуульд сонгогч саналаа өгөөгүй бол төрийн албанаас чөлөөлж дараагийн сонгуульд саналаа өгвөл ажилд нь эргүүлэн томилох гэх заалт ч хүний эрх зөрчсөн үйлдэл гэл ээ. Харин УИХ-ын гишүүн Д.Лүндээжанцангийн тайлбарласнаар бол орон нутгийн сонгуулийг ирэх арваннэгдүгээр сард зохион байгуулах нь зохисгүй.
Малчид өвөлжөөндөө буух их ажилтай нэг талаар давхцана, нөгөө хэсэг нь отор нүүдэл гээд явчихсан байх талтай. Тиймээс орон нутгийн сонгуулийг зохион байгуулах хугацаа ч бас асуудалтай гэж байна. Түүнчлэн маргааш болоах ээлжит чуулганаар хэлэлцэх асуудалд УИХ дахь МАН-ын гишүүд бүлэгтэй болох тухай хуулийн төслийг хэлэлцэх асуудал байхгүй байгаа нь эл алдаатай хуулийн заалтыг засч залруулахад хаалт болж байна гэл ээ.
Н.Түвшин