”Петро Чайна Дачин Тамсаг” ХХК-ийн үйлдвэрчний эвлэлийн холбооноос ажил хаялт зарлах болсон тухайгаа мэдэгдлээ. Тус компанийн ажилчид цалингаа нэмэх шаардлага тавьж ийнхүү ажил хаяхаар болсон байна.
БНХАУ-ын 100 хувийн хөрөнгө оруулалттай Монгол Улсын Засгийн газартай бүтээгдэхүүн хуваах гэрээ байгуулан ажилладг энэхүү компани 300 гаруй ажилчинтай тус компанийнхан хэлэхдээ "Сүүлийн таван жилийн хугацаанд компанийн зүгээс үндсэн цалин хөлсийг нэмэгдүүлээгүй.Гэтэл дэлхийн зах зээлд газрын тосны үнэ 2-3 дахин өссөн.
Улсын хэмжээний цалин хөлс мөн 2-3 дахин нэмэгдсэн. Уул уурхайн салбарын ажилчдын цалин хөлс 1000 доллараас дээш болсон. Салбарын ҮЭХолбоо, тус компанийн ҮЭ-ийн хорооноос нийт ажилчидтай хуралдаж цалин хөлс нэмэгдүүлэх талаар дөрвөн сарын өмнө шаардлага хүргүүлсэн ч одоог хүртэл арга хэмжээ аваагүй. Иймд Монгол Улсын Хөдөлмөрийн хуулийн дагуу хамтын маргаан үүсгэж, тус компанийн нийт ажилчдын цалин хөлсийг 50 хувиас дээш хэмжээгээр нэмэгдүүлэх шаардлага тавьж, биелүүлээгүй тохиолдолд ажил хаяна" гэсэн юм.
Д.Цэцэг