Нийслэлийн Иргэний танхим гурав дахь удаагийнхаа хэлэлцүүлгийг Улаанбаатар  хотын хог хаягдлын менежментийг сайжруулах зарим арга хэмжээний талаар зохион байгууллаа. Энэхүү хэлэлцүүлэгт НИТХ-ын дарга Д.Баттулга, Нийслэлийн Засаг дарга Э.Бат-Үүл, Улаанбаатар хотын Ерөнхий менежер Ч.Бат бусад холбогдох албаны хүмүүс, иргэдийн төлөөлөл оролцсон юм. Хэлэлцүүлгийн эхэнд Ерөнхий менежер Ч.Бат  “Хотын хог хаягдлын менежментийг сайжруулах арга хэмжээний тухай” танилцуулсан. Тэрээр, "Нийслэл хотыг хогноос салгах цогц арга хэмжээг авахаар шийдээд байна. Нийслэлд 2008 онд хог тээвэрлэх машин 60 байсан бол одоо 340 машинтай болсон. Өнгөрсөн онд Улаанчулуутын хогийн цэгийг хааж, Нарангийн хогийг ашиглалтад оруулсан. Үүнээс гадна Морингийн даваа, Цагаан даваа гэсэн газруудад хогийн цэг ажиллаж байна. Нарангийн хогийн цэгт эмнэлгийн хог хаягдлыг булж, устгаж байгаа. Удахгүй энд барилгын хог хаягдлыг хүлээн авах, боловсруулах үйлдвэр байгуулах юм. Нийслэлд 10 мянган орчим хогийн сав байх шаардлагатайгаас одоогоор 3000 л байна. Тиймээс хогийн савны тоог нэмэгдүүлэх хэрэгтэй байгаа. Хогноос салахын тулд бид найман тэргүүлэх зорилготой хөтөлбөр боловсруулсан" гэсэн юм. Мөн хог тээвэрлэдэг байгууллагуудын сонгон шалгаруулалтаар шалгаруулах бөгөөд хоггүй хороо, СӨХ-г тодруулж урамшуулах бол эсрэгээрээ хогноосоо салж чадахгүй байгаа газруудад хариуцлага тооцно гэдгээ хэллээ. Д.Цэцэг