Сайдын садан болж төрөх сайхан юм. Хууль зүйн сайд Х.Тэмүүжингийн төрсөн дүү Х.Хулан Боловсрол, шинжлэх ухааны яамны Хуулийн газрын даргаар томилогдлоо. Түүний өмнөхөн Ерөнхий сайд Н.Алтанхуягийн хүргэн Г.Дэнзэн Засгийн газрын Хэрэг эрхлэх газрын дэд даргаар тавигдсан. Хүн ам, нийгмийн хамгааллын сайд С.Эрдэнэ хамаатнаа бас л дарга болгож өөд нь татжээ. УИХ-ын байнгын хорооны дарга Ш.Түвдэндоржийн ах Ш.Төмөрбаатар Засгийн газрын нэгэн агентлагийн даргын суудлыг зайдагнаж байна. Эрхэм гишүүн асан, УИХ-ын даргын ахлах зөвлөх Г.Батхүү туслах бүсгүй н.Оюунцэцэгийгээ Боловсрол, шинжлэх ухааны яамны Хяналт, мониторингийн газрын дарга болгожээ.
Арвилан хэмнэлтийн бодлогоороо “алдаршсан” Лу.Гантөмөр энэ салбарын сайд болсныхоо дараа сарын сая шахам төгрөгийн цалинтай төрийн албыг захын хүнд гамгүй хуваарилж байна. Есдүгээр сарын нэгэнд шавь нараасаа цэцгийн баглаа, чихрийн цуглуулга авсан багш нарыг авлигачинд тооцсон шинэхэн сайдын энэ алхмыг ашиг сонирхлын зөрчилд дам идэгдэж буйн шинж хэмээн зарим багш үзэж байна.
Х.Улз