ШӨХТГ-ын дарга О.Магнай болон үүрэн телефоны оператор компанудын удирдлагууд өчигдөр сэтгүүчдэд хандан мэдээлэл хийсэн. Тэд мэдээллийнхээ эхэнд ярианы төлбөрийг секундээр тооцож эхлэхээр болсон тухай дуулгалаа. Энэ арга хэмжээ ирэх оны гуравдугаар сарын 1-ний өдрөөс эхлэхээр болсон байна. Гэхдээ энэ нь хэрэглэгчийн хүсэлтээр явагдана. Өөрөөр хэлбэл та өөрөө секундын алхамд шилжих эсэхээ шийдэх юм. Үүнийг “Мобиком корпораци”, “Юнител групп”, “Скайтел" ХХК, “Жи-Мобайл" ХХК бүгд хүлээн зөвшөөрч буйгаа илэрхийллээ. Харин барьцаа төлбөрийн хувьд хамгийн түрүүнд Мобиком корпораци өөрийн сайн түүхтэй, найдвартай хэрэглэгчдээ барьцаа төлбөрөөс бүрэн болон хэсэглэн чөлөөлөх ажлыг үе шаттай хийж эхлүүлэхээр болжээ.
Энэ үйл ажиллагаа арваннэгдүгээр сарын 1-ний өдрөөс эхлэх юм. Зайлшгүй тавих шаардлага нь цахим үнэмлэхтэй байх ёстой юм байна. Мобикомын компанийн зүгээс тодорхой хуваарь гаргаж ажиллахаас гадна хэрэглэгчиддээ утсаар мэдээлэл өгөх 2200 тусгай дугаарыг нээсэн байна.
Д.Цэцэг