Одыг тойрон эргэж, барагцаалбал гуравны нэг нь алмазаас бүрддэг гариг дэлхийгээс 40 гэрлийн жилийн зайд байна. АНУ, Францын одон орон судлаачид ийм дүгнэлт хийжээ. Мэлхийн орд дахь энэ гайхалтай гаригт нүүрстөрөгчийн өөр хэлбэр болох маш хатуу эрдэс үүсэхэд шаардлагатай бүхий л нөхцөл байна гэж АНУ-ын Йелийн их сургуулийн Никку Мадхудсудан, Францын Тулуз хотын одон орны физик, гариг судлалын хүрээлэнгийн Оливье Муссис нар үзэж байна.  “55 Cancri e” (латин үсгүүд) гариг нь диаметрээрээ манай дэлхийгээс  хоёр дахин том, массаараа найм дахин их ажээ. Гадаргуугийн температур нь  Цельсийн 2148 градуст хүрдэг байна. Энэ тэнгэрийн эрхэс дэлхийгээс  энгийн нүдэнд харагдах өөрийн одыг маш түргэн зуур тойрдог бөгөөд тэндхийн нэг жил нь дэлхийн барагцаалбал 18 цаг  үргэлжилдэг  ажээ. “Энэ гаригийн гадаргуу боржин, ус гэхээсээ бал чулуу, алмазаар бүрхэгдсэн болов уу” гэж Махмудсудан тодруулан тайлбарлажээ. “55 Cancri e” гаригийн массын барагцаалбал гуравны нэг нь алмаз гэдэгт эрдэмтэд итгэлтэй байна. Энэ нь ойролцоогоор дэлхийн гурван масстай тэнцүү гэсэн үг юм. Алмазаар баялаг тэнгэрийн эрхсүүд байдаг нь шинжлэх ухаанд тодорхой юм. “55 Cancri e” гариг нь  бусад ийм гаригийг бодвол харьцангуй сайн судлагдсан бөгөөд нартай адилхан одыг тойрон эргэдэг байна. Химийн найрлагаараа энэ гариг дэлхийгээс “үндсээрээ ялгаатай” гэдгийг судлаачид цохон заажээ. С.Золбоо