Өвөрхангайн тойрогт нэр дэвшсэн Г.Батхүү, Д.Зоригт нарыг тангараг өргүүлэхийг эсэргүүцсэн МАН-ын гишүүдээс бүрдсэн “Ардчиллыг аврах ард түмний хөдөлгөөн”-д оролцогчид Ерөнхий сайд Н.Алтанхуягт шаардлага хүргүүллээ. Эл шаардлагыг бүрэн эхээр нь хүргэе.
Шаардлага
2012 оны аравдугаар сарын 19-ний өдөр Сүхбаатарын талбайд болсон “Ардчиллыг аврах ард түмний хөдөлгөөн”-д оролцогчдын хүргүүлсэн шаардлагыг хүлээн авах үедээ Та “Энэ цуглаан нь мөнгө авсан хүмүүсийн цуглаан. Хүмүүсийг мөнгөөр цуглуулсан баримт мэдээ надад бий” гэж хэлжээ.Шинэчлэлийн нэртэй Загсийн газар, түүний харьяа агентлагуудыг Та эрээвэр хураавар хүмүүс, ах дүү, амраг садан, нутаг нуга, ангийн хүүхдүүд, намын нөхдүүдээр байгуулан ажиллаад 100 гаруй хонож байна. Энэ хугацаанд Та болон танай нам, Засгийн газраас сайн сайхныг хүсэн хүлээсэн хүмүүс цөхрөнгөө барж, Монголын ардчилал устаж байгаад эмгэнэж жагсаал, цуглаанд сэтгэл зүрхээрээ оролцсон юм. Эсвэл Та өөрөө мөнгө өгч захиалгат жагсаал хийлгэдэг байсан болоод тэгж хардаж байгаа юм уу. Таны Засгийн Газарт хүмүүс мөнгө төлж албан тушаал авч, ажил хийдэг болсон юм уу.
Юмны үнэ тэнгэрт хадлаа. Шуудай нүүрс, үмх мах, атга гурил, балга сүү ямар үнэтэй болсныг Та мэдэх үү? Төсөв, татвар нэмэгдүүлэх Таны харалган бодлогын уршгаар архи, тамхины үнэ дагасан үнийн хийрхэл газар авлаа. Үүгээр ч зогсохгүй өөрийн биедээ амар аргаар ирээдүй хойчдоо дарамт болох дааж давшгүй их өрөнд ард түмнийг барьцаалах гэж байгаа Таны санаархалд зэвүүцэн жагссан юм. Сонгуулийн үед амлахдаа “Алтан шумуул” мэт танай намын мөрийн хөтөлбөрөөс барьцтай, тоймтой асуудлууд Засгийн газрын мөрийн хөтөлбөрт тусаагүйд бухимдахдаа ард түмэн жагссан юм.
Ардчилсан намаас УИХ-д байгаа гишүүдийн тоог 39-д хүргэх зорилгынхоо дагуу шүүхээр сонгууль хийдэг балмад санаархалйыг чинь эсэргүүцэж ард түмэн жагссан юм. Үндсэн хуулиас эхлэн Сонгуулийн хуулиар дараалан энэ улсын бүх хуулийг зөрчин тохуурхаж байгаад чинь, ардтүмний саналыг засч улаан цайм дээрэмдэж байгаад чинь тэвчих аргагүйд хүрсэн ард түмэн жагссан юм.
Хууль зөрчигчдийг гэмт хэрэгтэн гэдэг. Хууль зөрчиж байгаа З.Энхболд, Н.Алтанхуяг, Ч.Содномцэрэнтэнгүүд бүгд гэмт хэрэгтнүүд мөн. Гэмт хэрэгтнүүд төрд шургалж, ард түмнийг доромжлох ёсгүй. Төрийн эрхийг авахын тулд төрийн эсрэг гэмт хэрэг явуулж байгаа хүмүүсийн үйл ажиллагааг ард түмэн бид өөрсдөө таслан зогсоох ёстой.
Тиймээс, жагсаалд оролцсон хэн гэж овогтой хэн гэдэг хүн ямар хүнээс хэдэн төгрөг авсныг Та нэр ус, баримттай нь өөртөө байгаа мэдээллийн дагуу ард түмэндээ мэдэгдэж Ерөнхий сайдын үндсэн үүргээ биелүүлнэ үү. Гэхдээ Та худлаа ярьж, хүн гүтгэж, хэлмэгдүүлж болохгүй. Хэрэв Та худал мэдээлэл авсан бол, эсвэл Та сандраад худлаа хэлсэн бол итгэл үнэмшлээрээ жагссан гэмгүй ард түмнээ гүтгэн доромжилсондоо ард түмнээсээ хэвлэл мэдээллийн хэрэгслээр албан ёсоор уучлалт гуйх ёстой. Таныг 24 цагийн дотор ард түмэндээ үнэнийг хэлэхгүй, уучлалт гуйхгүй бол хуулийн дагуу шүүхэд өгнө гэдгээ мэдэгдъе. Дараа нь Та Ардчиллыг аврах ард түмний цуглаанд оролцогчдын өгсөн шаардлагын дагуу огцрох ёстой.
Н.Бүжин