Хөдөлмөрийн аюулгүй ажиллагаа алдагдсаны улмаас барилга дээр гарах ослын тоо буурахгүй байна. Үүнтэй холбоотойгоор иргэд амь насаа алдах явдал гарсаар байгаа. Өчигдөр орой 20.00 цагийн үед бас нэгэн осол гарч хүний амь нас хохирсон хэрэг гарчээ. Энэ талаар Нийслэлийн мэргэжлийн хяналтын газрын Хөдөлмөрийн аюулгүй байдлын хяналтын улсын ахлагч байцаагч Д.Төгссайханаас тодруулсан юм. Тэрээр "Нийслэлийн Баянзүрх дүүргийн 25 дугаар хороо "Гангар инвест" ХХК-ийн барьж байгаа барилга дээрээс хоёр хүн унасан. Тэр хүмүүс 16 давхар 300 айлын орон сууцны зориулалтаар барьж байгаа уг барилгын 13 давхарт ажиллаж байсан юм билээ. Дүүжинт өргүүрийн олс тасарснаас энэ хэрэг гарсан. Бэртсэн хүмүүсийн нэг нь эмнэлэгт хүргэгдэх замдаа нас барсан бол нөгөө хүнийх нь гар тохойгоороо тасарсан. Бид барилга дээр ажиллаж байгаа хүмүүст удаа дараа сургалт зохион байгуулж, заавар зөвлөгөө өгч зөвлөмж гаргаж байгаа ч хөдөлмөрийн аюулгүй байдал алдагдсаар хүний амь нас хохирсоор байна. Барилгууд мэргэжлийн бус хүмүүс ажиллуулахаа зогсоомоор байна" гэлээ.
Түүнчлэн өнгөрсөн долоо хоногт “Гангар Инвест” ХХК-ийн барилга дээр ажиллаж байгаа хятад ажилчид дадлагын оюутнууд болох Н.Дэлгэрсайхан, П.Алтанхуяг нарыг зодож танхайрсан хэрэг гарсан. Хохирогчид энэ хэргийг цагдаад мэдэгдэх гэсэн боловч “Гангар Инвест” компанийнхан байгууллагын нэр хүндэд муугаар нөлөөлнө гэсэн шалтгаанаар мэдэгдэхгүй байхыг хүсчээ.
Энэ хэргийн дагуу Нийслэлийн Баянзүрх дүүргийн Цагдаагийн хэлтсийн байцаагчид тус барилга дээр ажиллаж байгаа хятад ажилчдыг шалгахад 25 хүн бичиг баримтын зөрчилтэй байсан байна.
Д.Цэцэг