Эрүүгийн цагдаагийн газрынхан хүн худалдаалах гэмт хэрэгт хүч өгөн ажиллаж байна. Энэ оны аравдугаар сарын байдлаар хүн худалдаалсан ес, бусдын биеэ үнэлэхийг зохион байгуулсан 17 хэргийг илрүүлжээ. Тухайлбал, охидыг БНХАУ-ын Эрээн,  Хөх хот, Шинъяан, Гуанжоу болон Малайз улс руу хил давуулахаар завдсан хэрэг эзэлж байгаа юм. Одоогийн байдлаар бага насны охидуудын биеийг зохион байгуулалттайгаар үнэлүүлж байсан бүлэг этгээдийг эрүүгийн цагдаа нар илрүүлэн УМБГ-т шилжүүлэн өгсөн байна. Бага насны охидын биеийг үнэлүүлсэн бүлэг этгээд нь охидыг асран хамгаалагчгүй явж байхыг далимдуулан сүрдүүлэх замаар зочид буудалд аваачиж бусдад зарж байсан гэнэ. Үүнтэй холбогдуулан охидыг хүчирхийлж байгааг мэдсэн атлаа мэдээлээгүй нэр бүхий зочид буудлуудын эздэд эрүүгийн хэрэг үүсгэжээ. Мөн сүүлийн үед манай улсад интернет цахим сүлжээ хурдастай хөгжихийн хажуугаар, цахим мэдээллийн хуудасууд дээр садар самуун зураг, кино дүрс бичлэг нь ихээр гарах болсон. Энэ нь Монгол Улсын Эрүүгийн хуулийн 123-р зүйлд зааснаар "Садар самууныг сурталчилсан хэвлэл , ном зохиол , зураг , кино , дүрс бичлэг, бусад зүйлсийг бэлтгэсэн, тараасан, борлуулсан, нийтэд үзүүлсэн, энэ зорилгоор улсын хилээр нэвтрүүлсэн бол хөдөлмөрийн хөлсний доод хэмжээг 31-50 дахин нэмэгдүүлсэнтэй тэнцэх хэмжээний төгрөгөөр торгох, эсвэл 1-3 сар хүртэл хугацаагаар баривчлах ял шийтгэнэ гэж тусгасан. Гэтэл мэдээллийн зарим цахим хуудасууд насанд хүрэгчдэд гэх булан нээж тухайн буландаа садар самуун агууламж бүхий о кино, зураг дүрс бичлэг байрлуулан нийтэд үзүүлэн сурталчлан гар утсандаа татах боломжийг бүрдүүлж байжээ. Одоогийн байдлаар эрүүгийн цагдаа нар садар самуун контент агуулсан арав гаруй цахим хуудасны эздэд хариуцлага тооцож,  зарим нэгэнд нь эрүүгийн хэрэг үүсгэн шалгаж байна. Д.Цэцэг