Найман настай охиноо мөчлүүлж онц хэрцгийгээр хөнөөлгөсөн  эмэгтэй Хөвсгөл аймгаас Улаанбаатарт шүүх хуралд оролцохоор хүрэлцэн ирсэн боловч биеийн байдал нь муудаж эмчийн хяналтад байгаа аж. Түүний охиныг хөнөөсөн хэрэг нь ДНК-ийн шинжилгээгээр нотлогдсон Н.Мөнх-Оргилыг энэ сарын 8-ны өдөр Чингэлтэй дүүргийн шүүхэд шүүнэ. Н.Мөнх-Оргилд анхан болон давж заалдах шатны шүүхээс цаазын ял оноосон ч өнгөрсөн тавдугаар сард Дээд шүүхийн хяналтын шатны хуралдаанаар хэргийг нэмэлт мөрдөн байцаалтад буцаасан юм. Улмаар хэргийг  таван сар орчим шалгаж дуусч ийн анхан шатны шүүхээр хэргийг нь хэлэлцүүлэхээр болоод байгаа юм.  Уг хэрэгт  хохирогчийн өмгөөлөгчөөр н.Содномпил ажиллаж байна. Н.Мөнх-Оргилыг эрүүгийн хуулийн 125.2 буюу бэлгийн дур хүслээ ёс бусаар хангасан, энэ хэргийг давтан үйлдсэн, 126.3 буюу насанд хүрээгүй хүүхдийг хүчирхийлсэн  91.2.6 91.2.10, 91.2.15-д зааснаар  буюу  гэмт хэргээ нуун далдлах зорилгоор, санаатайгаар, хохирогчийг биеэ хамгаалах чадваргүйг мэдсээр байж амь насыг нь хөнөөсөн гэмт хэрэгт буруутгаж байгаа. Н.Мөнх-Оргилыг найман настай охиныг хүчирхийлж амийг нь егүүтгэснээс гадна Баянгол дүүргийн нутаг дэвсгэрт бага насны гурван охин хүчирхийлсэн хэрэгт буруутгаж байгаа билээ. Н.Түвшин