Өнөөдөр Налайх дүүргийн шүүхийн Эрүүгийн танхимд “Хаан банк”-нд халдаж хүний амь хөнөөсөн А.Бат-Ялалтын шүүх хурал боллоо. Гэвч шүүх хуралд оролцох шүүгчдийн бүрэлдэхүүн солигдсон тул шүүх хурлыг энэ сарын 20-ныг хүртэл хойшлуулсан юм. Ингээд хурлын дараа хохирогчийн өмгөөлөгч В.Бадамцэцэгээс дараах зүйлийг тодрууллаа. - Хэрэг өнгөрсөн хоёрдугаар сард гарсан. Өнөөдрийг хүртэл мөрдөн байцаалтын ажиллагаа явагдлаа.  Хохирогчийн талаас ямар байр суурьтай байна вэ? -Мөрдөн байцаах ажиллагааг хуулийн дагуу явагдсан гэж хохирогчдын зүгээс үзэж байна. Улсын яллагчийн зүгээс шүүгдэгчийн үйлдэлд хуульчилсан зүйл анги тохирч байгаа.  Учир нь шунахайн сэдэлтээр, онц хэрцгий аргаар, нийтэд аюултай аргаар, мөн хүн барьцаалан хүний амь насыг санаатай хөнөөсөн. Түүнчлэн хэрэг үйлдэхдээ банкаар үйлчлүүлж байсан нэг иргэнийг буудсан. Улмаар гарч зугатаах үедээ такси бариад таксины жолоочид буу тулгасан. Ийм олон нийтийг цочроосон хэрэг үйлдсэн тул хуульчилсан зүйл ангийг зүйтэй гэж үзэж байна. -Энэ хугацаанд шүүгдэгчийн талаас хохирогчийн талтай уулзаж уучлалт гуйгаагүй гэсэн. Тэгэхээр энэ хугацаанд сэтгэл санааны нөхөн төлбөр олгоогүй гэж ойлгож болох уу? -Одоогоор алга байна.  Гэхдээ бид хохирлын хэмжээг тогтоогоод өгчихсөн байгаа. Насанд хүрээгүй хүүхдэд нь тэтгэмж олгоогүй. Оршуулгын зардал гэж нэг ч төгрөг өгөөгүй. Нэг ч уучлалт гуйгаагүй. Иймэрхүү л байдалтай байна даа. - Шүүгдэгч А.Бат-Ялалтыг хэвлэлээр эхнэр, хүүхэдтэй гэсэн мэдээлэл гарсан байсан? - Үгүй ээ. Ганц бие залуу гэж хавтаст хэрэгт авагдсан байсан. - Түүнийг хэвлэлээр хэргийг санаатай болон санамсаргүй үйлдсэн гэж янз бүрээр тайлбарласан байдаг? - Яг хэрэг үйлдсэн шалтгааныг А.Бат-Ялалтын мөрдөн байцаалтын явцад өгсөн мэдүүлгээр нь тогтоосон байдаг. -Юу гэж мэдүүлсэн байдаг юм бол? -Мөрдөн байцаалтын явцад А.Бат-Ялалт "Би маш их мөнгөний асуудалд орсон. Тиймээс мөнгө олох зорилгоор хэргийг үйлдсэн" гэж мэдүүлсэн байдаг. Гэхдээ бууг урьдчилан бэлтгэсэн байсан, захирлын өрөөнд бэлэн мөнгө байхгүй гэдгийг мэдэж байгаа. Тийм байж захирлыг барьцаалаад өрөөг нь түгжсэн. Ер нь бол захирлаар мөнгө бэлдүүлэх санаатай байсан гэж мэдүүлсэн байдаг. Гэхдээ  үнэн хэрэгтээ ямар ч бэлэн мөнгөгүй хүн дээр ороод буу тулгасан нь яг мөнгө олох зорилготой байсан гэхэд хэцүү. -Өнөөдрийн шүүх хуралд талийгаачийн эхнэр ирсэн үү? -Ирээгүй. Сэтгэлийн маш их дарамттай байгаа. Маш их уйлж, ухаан алдаж байна. Өөрийн биеэр хүрэлцэн ирж чадахгүй. Гэхдээ шүүхийг хүндэтгээд төрсөн эгчийгээ итгэмжлэгдсэн төлөөлөгчөөрөө явуулсан. -Шүүгдэгч цагдан хоригдож байгаа юу? -Тийм. Цагдан хорих 461 дүгээр ангид байгаа. -Хуулийн дагуу гэм хорын хохирлыг заавал төлөх ёстой байдаг биз дээ? -Тийм. А.Бат-Ялалтын нэр дээр нэг өрөө байр байдаг. Гэтэл өнөөдөр А.Бат-Ялалтын хамаатнууд тэр байрыг минийх, минийх гэж булаацалдаж байна. Гурван хүүхэдтэй айлын амьдралыг орвонгоор нь эргүүлчихээд өнөөдөр ийм байдал гаргаж байгаад нь харамсч байна. -Шүүх хуралд та өмгөөлөгчийн зүгээс ямар байр суурьтай оролцож байна вэ? -Мэдээж онц хүнд хэрэг учраас ялын дээд хэмжээ онооно байх гэж бодож байна. Б.Чимэг Эх сурвалж: 24stag.mn