Монгол Улсаас Арабын Бүгд Найрамдах Египет Улсад суугаа Элчин сайдын яам, Египетийн сангийн хооронд байгуулсан гэрээний дагуу манай улсын хил хамгаалагчид тус улсын Дотоод яамны Академийн дунд хугацааны сургалтад хамрагдаж байна. Сургалтын хөтөлбөрт Египетийн хил хамгаалах албаны үйл ажиллагаатай газар дээр нь танилцахын зэрэгцээ онолын болон биеийн хүчний сургалтад хамрагдах, харилцан арга туршлагаа солилцох семинар, зөвлөлгөөн хийх зэрэг олон арга хэмжээ багтжээ. Синайн хойг, ялангуяа Израильтай залгах хилийн бүс, Судантай хиллэж буй газрууд, Улаан тэнгисийн хилийн хамгаалалтаараа дэлхийд танигдсан Египетийн хил хамгаалах албаныхантай харилцан арга туршлагаа солилцох зорилго бүхий энэ удаагийн сургалтад манай улсын хилийн ихэнх отряд, заставын төлөөлөл болсон 23, төвийн командлалын 2 офицерийн бүрэлдэхүүнтэй төлөөлөгчид нэг сарын хугацаанд мэргэжил дээшлүүлж байгаа юм хэмээн Гадаад харилцааны яамнаас мэдээллээ.