Жүдо, самбо бөхийн улсын шигшээ багийн залуурыг гуч гаруй жил жолоодож, олимп дэлхийн анхны аваргууд төрүүлэх үйлсэд гар бие оролцсон Ч.Насантогтох хэмээх эрхмийг монголчууд андахгүй. Ц.Дамдин, Р.Даваадалай, О.Балжинням, Д.Баттулгаас эхлээд Н.Түвшинбаяр, Х.Цагаанбаатар, М.Бундмаа, С.Ням-Очир нарын олон шилдгүүд Насан багшийн шавь билээ. Тиймдээ ч түүний хөдөлмөр зүтгэлийг төр засгаас үнэлэн гавьяат дасгалжуулагч, ардын багшийн хэргэм хүртээсэн төдийгүй дасгалжуулагчдаас анх удаа Монгол Улсын хөдөлмөрийн баатар цолоор 2011 онд шагнасан байдаг.
Насныхаа амралтад суусан Насаа багш саяхан буурь сэлгэн хилийн дээс алхсан тухай мэдээ ирлээ. Тэрээр БНХАУ-ын Өвөр Монголын жүдо бөхийн шигшээ багийн ахлах дасгалжуулагчийн алба хашихаар явж, цалин пүнлүүгээ нэгэнт тохиролцжээ. Ирэх онд болох Бүх Хятадын спартакиадад жүдочдоо амжилттай оролцуулахын тулд ийн Ар Монголын алдарт багшийг Өвөр Монголд урилгаар ажиллуулж байгаа бололтой. Дөрвөн жил тутмын уг спартакиаддаа өмнөд хөршийнхөн олимпийн наадмаас ч илүү анхаарал тавьж, илүү их хөрөнгө зардаг аж. 2009 оны наадамд нь манай улсаас жүдогийн Х.Болдбаатар, буудлагын Л.Ундралбат нар Өвөр Монголын шигшээ багийг удирдан оролцож байлаа.
Түүнчлэн Ч.Насантогтох дасгалжуулагчийн төрсөн ах, Мехико-1968 олимпийн хүрэл медальт, Монгол Улсын ардын багш, гавьяат тамирчин Ч.Дамдиншарав Өвөр Монголын чөлөөт бөхийн шигшээ багт арав шахам жил ажилласан билээ.
Ш.Түмэнбаяр