Орон нутгийн сонгуулиар үнэмлэхүй ялагдал хүлээсэн МАН цөөн хэдэн аймагт ялсан гэгдээд байгаа ч одоогоор дүн нь эцэслэн гараагүй байгаа. Харин ч зарим аймагт сонгууль будлиантай болсон төдийгүй нэр дэвшигчид нь эхнээсээ шүүх, цагдаагийн хаалга татаад эхэлсэн. Орон нутгийн эрх мэдлийн төлөө улайран дайрсан Сэлэнгэ аймгийн МАН-ын нэр дэвшигчдийн заримыг нь шүүхийн шийдвэрээр хүчингүйд тооцож эхэлжээ. Сонгуулийг шоглоом болгосон тэдний хууль бус булхай луйвар цаашид ч үргэлжлэх төлөвтэй байна. Хамгийн түрүүнд тус намаас Сэлэнгэ аймгийн Иргэдийн төлөөлөгчдийн хуралд нэр дэвшсэн Засаг даргын Тамгын газрын Тохижилт, үйлчилгээний хэлтсийн дарга Ж.Сайнцогийг тус Аймгийн сум дундын захиргааны хэргийн шүүхээс хууль зөрчсөнийг нь тогтоож, эрхийг нь хүчингүй болгожээ.
Тэрбээр Орон нутгийн сонгуулийн тухай хууль болон төрийн алба хаагчийн тухай хуулийг зөрчиж, сонгуульд оролцсон гэдэг нь тогтоогдсон байна. Хуулинд бол төрийн алба хаагч сонгуульд нэр дэвших тохиолдолд энэ оны нэгдүгээр сарын 01-нээс өмнө өргөдлөө өгч төрийн албанаас түдгэлзэх ёстой атал Ж.Сайнцог гэгч хууль зөрчин сонгуульд нэр дэвшсэн учир ийнхүү эрхээ хасуулахад хүрчээ. Шүүхийн шийдвэр нэгэнт гарч төрийн албатайгаа сонгуульдсан Ж.Сайнцог ИТХ-д суух эрхгүй болов. Өвлийн сонгуулийг өөрсдөдөө ашигтайгаар эргүүлэх гэсэн МАН-ын санаархал ийнхүү бүтэлгүйтэж нэр дэвшигчид нь эхнээсээ суудлаа алдаж байна.
Сэлэнгэ аймгийн МАН-ынхан энэ удаагийн Орон нутгийн сонгуулиар аймгийн ИТХ-ын нийт 37 суудлын 20-ийг нь авч ялалт байгуулсан хэмээн сүржигнэж байгаа ч энэ бүхэн хууль бус ялалт болох нь илэрч, булхай луйвар, будлианыг нь хуулийнхан тогтоож, нэр дэвшигчидийнх нь эрхийг хасах шийдвэр гаргажээ. Маргаан ингээд зогсохгүй цаашид ч өрнөсөөр байна. Сэлэнгэ аймгийн ИТХ-д Хүдэр сумаас нэр дэвшсэн Х.Пүрэвдорж гэгч бас л хууль зөрчсөнийг цагдаагийн байгууллага шалган тогтоож, хэргийг нь прокурорт шилжүүлээд байна. Тэрбээр мөн л Аймаг, сум, дүүргийн сонгуулийн тухай хуулийг зөрчин нэр дэвшжээ. Нэр дэвшигч нь тухайн орон нутагтаа 180 хоногоос дээш байнга суурьшсан байх ёстой хуулийн заалттай.
Гэтэл Х.Пүрэвдорж нь нүүдлийн царцаа болон Улаанбаатараас нүүдэллэж очоод сонгуульдсан нь тогтоогдов. Ардын намынхан сүүлийн жилүүдэд Сэлэнгэ аймгийг засаглахдаа аймгийг там болгосныг ард иргэд нь эсэргүүцсээр байгаа энэ үед гал дээр тос нэмнэ гэгчээр иргэд сонгогчдыг хууран мэхэлсэн эдгээр хууль бус явдал иргэдийн дургүйцлийг улам ч ихээр хүргэж байна. Орон нутагт эрх мэдэл, хөрөнгө санхүүгийн боломжийг нь нээж өгсөн энэ үед Ардын намынхан аймгийн эрх мэдлийн төлөө, өв залгамжаа суулгахын төлөө улайран зүтгэсний гай болон лайгаа эдэлж, үйлээ үзэж эхэллээ. Сэлэнгэ аймгийн ИТХ-д МАН олонхи бус цөөнх болох нь одоо тодорхой болж байна. Нэр дэвшигчдийнх нь үнэн нүр царай ил болж, булхай луйвар нь хуулийн байгууллагаар тогтоогдож эрхээ хасуулсаар байгаа энэ цаг үед эрх мэдлээ алдахаас “үнхэлцгээ” хагартал айсан Ардын намынхан доошоо харж уйлж, дээшээ харан инээнэ гэгч болж байгаа аж. Нүүрээ хийх газаргүй болтлоо нэр хүнд нь навс унасан тэдний хууль бус үйлдлийг шүүх, цагдаа, прокурор шударгаар тогтоож байгаа нь, сонгогч олны эрх ашигт нийцэж байгаад айгийн иргэд ихэд талархалтай хандаж байна.
Алдсан хүн арван тамтай гэгчээр аймгийн эрх мэдлээ алдахад хүрээд байгаа Ардын амынхан одоо дээшээ тэнгэр хол доошоо газар хатуу гэгч болов. Тэр ч байтугай Сэлэнгэ аймагт МАН-аас сонгогдсон УИХ-ын гишүүн Ж.Эрдэнэбат аргаа барахдаа олон нийтийн тархийг угаахаар хэвлэл, мэдээллийн хэрэгслээр “матрын нулимс” унагав. Тэрбээр намынхныхаа сонгуулийн булхай луйврыг өмгөөлөн хаацайлж эгээтэй л “буйдантай” суулт зарлах нь холгүй явна. Сэлэнгийн сонгуулийн булхай үргэлжилсээр. Даравч далдайна, булавч бултайна гэгчээр Ардын намын булхай илэрсээр байна. Ийнхүү Сэлэнгэ аймгийн Ардын намын нөхдүүд зарим нь төрийн албатайгаа, зарим нь Улаанбаатараас нүүдэллэн “сонгуульдаж” аймгийн ИТХ-ын суудлаас “зулгаах” гээд бүтэлгүйтэхэд хүрчээ. Удахгүй бид аймгийн шүүхийн шийдвэр болон Сэлэнгийн сонгуулийн талаарх шинэ содон мэдээллийг эрхэм танд хүргэх болно.
Эх сурвалж
www.wikimon.mn
-Зөвшөөрөлтэйгөөр нийтлэв-