Хойд Солонгос энэ сарын 10-22-ны хооронд баллистик пуужин хөөргөхөө мэдэгдээд байсан. Харин өнгөрсөн бямба гаригт тус улсын албаныхан пуужинг хөөргөхөө хойшлуулж магадгүй гэсэн мэдээлэл өгөөд байгаа. Гэхдээ чухам ямар шалтгаанаар пуужингаа хөөргөхөө хойшлуулах болсныг тайлбарлаагүй байна.
Үүнийг Өмнөд Солонгосын эрдэмтэд, инжинер техникийн ажилчдын дэвшүүлж буй таамаглалд “Хөөргөх гэж байсан пуужинд дахин засвар хийх шаардлага тулгарсан учраас хойшлуулсан” хэмээжээ.
Хойшлуулсан ч гэсэн баллистик пуужинг хөөргөх хэвээр байгаа учир тайвшрах болоогүй гэж олон улс хэлж байна.
Өмнөх мэдэгдэлд АНУ болон бусад орнууд НҮБ-ийн гаргасан баллистик пуужин хөөргөхийн эсрэг хоригийг сануулсаар байгаа. Хойд Солонгосын зүгээс баллистик пуужин хөөргөх гэж буй хоёр дахь оролдлого нь энэ юм.
Өнгөрсөн дөрөвдүгээр сард пуужин хөөргөх гэж байсан ч чадаагүй юм. Тэгэхээр энэ удаад пуужинг заавал хөөргөнө гэж үзэж байгаа байх хэмээн олон улсын шинжээчид хэлж байна.
Э.Мөнхнасан