Ач санах учиртай хүнийхээ шүүх хуралтай давхцан ийнхүү аяглаж байгааг харсан хүмүүс огт таашаахгүй байна. Тавьж байгаа шаардлага нь зөв зүйтэй байж болно, гагцхүү цагаа олсонгүй дээ гэж шогшрох хүмүүс ч олон байна. ТВ9 нь сэтгүүлчдэд шударга үнэний дуу хоолой байх зарчмыг нь хэрэгжүүлэх бүхий л бололцоог хангасаар ирсэн бөгөөд арилжааны ТВ-үүдээс хамгийн дориун цалинтайн дээр хамгийн олон үзэгчтэй, ард түмний шимтэн үзэх дуртай телевизийн нэг болж чадсан юм. Харин МАХН-ын дарга Н.Энхбаярт анхлан зохиомол хэрэг үүсгэхдээ ТВ9 телевизийн зарим тоног төхөөрөмжийг хууль бусаар авсан гэх гүтгэлэг анх энэ л ТВ-тэй холбогдон гарсан. Уг нь Монголын хүн амын дийлэнх нь шүтэн биширсээр ирсэн буддын шашны сургаалыг үзэгчдэд хүргэж, сэтгэлийг ариусгах олон сайхан нэвтрүүлэг бэлтгэн хүргэсээр ирсэн буяныг нь шүүгчид ч хайхарсангүй , олон хүнийг ажлын байраар ханган ар гэрийнх нь амьжиргааг давхар тэтгэж байсныг гоморхох уран бүтээлчид ч анзаарсангүй. Шүүгчид ч, сэтгүүлчид ч ийнхүү Энхбаярт үнэхээр ээлгүй хандсаныг сүүлийн өдрүүдийн үйл явдал гэрчилнэ. Монголчууд ёс жудагтай хүмүүс. Хүнийг зовж явахад нь элдэв хатуу үйлд уриалан дуудах байтугай эсэн бусын муу бодлыг ч өөрөөсөө зайлуулж чаддаг тэвчээртэй ард түмэн. Энэ журмыг хүнд хэцүү өдрүүдэд даанч эргэцүүлэн тунгааж чадаагүй ТВ9-ийнхний өмнөөс Энхбаяр даргаас хүлцэл өчмөөр санагдлаа.
У.Батцэцэг