ОБЕГ-ын Дархан-Уул аймаг дахь Аврах, гал унтраах ангийн аврагчид өнгөрсөн шөнө таван хүнийг хөлдөх аюулаас аварчээ. Тодруулбал, Дархан-Уул аймгийн нутагт Төмөр замын 42 дугаар өртөөний ойролцоо хоёр машин цасанд суусан гэх дуудлагын дагуу Аврах, гал унтраах 55 дугаар ангийн аврагчид очиж, шөнийн 24.00 цаг орчимд татаж гарган, таван хүнийг хөлдөх аюулаас аварсан байна.
Мөн Орхон аймгийн Баян-Өндөр сумын Говил багийн Ар булагийн замд хоёр машин цасанд суусан тухай дуудлагаар аймгийн Онцгой байдлын газрын аврагчид өнөөдөр үүрийн 04.40 цагт гарсан аж. Тэд цасанд суусан машиныг татаж гарга, зорчиж явсан иргэдийг аюулгүй болгожээ.
Дашрамд дуулгахад, цас ихээр орж буй энэ өдрүүдэд холын замд аялж буй иргэд тээврийн хэрэгсэлийнхээ аюулгүй байдлыг шалгаж, болзошгүй эрсдлээс өөрийгөө хамгаалах хувийн бэлтгэлээ сайтар хангахыг ОБЕГ-аас анхаарууллаа.
П.Наран