УИХ дахь МАН-ын бүлэг өнөөдөр удирдлагын төвшинд хуралдаж, тодорхой хуулийн төслүүдийг хэлэлцлээ. Энэ талаар УИХ дахь МАН-ын бүлгийн дарга Н.Энхболд, дэд дарга С.Бямбацогт нар сэтгүүлчдэд мэдээлэл өгсөн юм.
-УИХ дахь МАН-ын удирдлагууд ямар асуудлыг голчлон хэлэлцсэн бэ?
-Манай намын бүлэг оны өмнө хуралдсан. Өнөөдрийн хувьд удирдлагын төвшинд хуралдлаа. Энэхүү хуралдаанаар Засгийн газрын тэргүүн, мөн сайд нарыг хуралдаандаа оролцуулан мэдээлэл сонсч байх дэг тогтоохоор боллоо. Ерөнхий сайдыг ирэх долоо хоногт бүлгийн хуралдаандаа оролцуулж Засаг дарга нарын томилгооны талаар мэдээлэл сонгох хүсэлтийг тавина.
Өөрөөр хэлбэл, “Орон нутгийн сонгуулийн дүнд МАН нь 21 аймгийн есөд, нийслэлийн есөн дүүргийн дөрөвт ялалт байгуулсан. Гэвч өнөөг хүртэлх хугацаанд есөн аймгаас ердөө гурвынх нь Засаг даргыг Ерөнхий сайд батламжилсан бол хотын дарга Э.Бат-Үүл нь дөрвөн дүүргээс ердөө нэг дүүргийн Засаг даргыг баталсан. Энэ нь орон нутгийн сонгуулийн дүнг хүлээн зөвшөөрч чадахгүйтэй холбоотой байх магадлалтай” гэж үзэж байгаа манай гишүүд. Засаг дарга нарын томилогооны асуудалд улстөржиж болохгүй. Орон нутагт өвөлжилт хүндэрч цаг агаар хүндрэлтэй болсон энэ үед Засаг даргыг яаралтай батламжлах шаардлагатай байна.
Ямар ямар аймгийн Засаг даргыг батламжлаагүй юм бэ?
- МАН ялалт байгуулсан Завхан, Дархан, Өвөрхангай аймгийн Засаг даргыг батамжилсан. Харин Хөвсгөл, Сэлэнгэ, Говь-Алтай, Говьсүмбэр зэрэг нийт зургаан аймгийн Засаг даргыг өнөө хэр нь батламжлаагүй. Уг нь аймаг бүрийн ИТХ-ын төлөөлөгчдийн хуралдаан болж, Засаг даргынхаа нэрийг дэвшүүлэн, 2-3 удаа Ерөнхий сайдад уламжилсан. Гэвч өнөөдрийг хүртэл батламжлахгүй цаг алдаж байгаа нь цаанаа нийгмийн хувьд маш их сөрөг үр дагавар дагуулж байна.
Мөн Шинэчлэлийн Засгийн газраас гаргасан “Чингис бонд” нэртэй 1.5 тэрбум ам.доллартай тэнцэх хэмжээний бондын талаар Ерөнхий сайдыг манай бүлэгт мэдээлэл хийх хүсэлтийг хүргүүлсэн.
Бонд бол цаанаа Монголын ард түмний ирээдүйд төлөх их өр. Тиймээс Засгийн газраас энэ чиглэлээр байгуулагдсан зөвлөлд сөрөг хүчнээс төлөөлөл оролцуулж хяналт тавих ёстой Түүнчлэн Монгол Улсын Их Хурлын тухай хуульд өөрчлөлт оруулах тухай хуулийн төсөл /Монгол Улсын Ерөнхийлөгчөөс өргөн мэдүүлсэн хуулийн төслийг тус тус хэлэлцлээ.
УИХ-ын гишүүний бүрэн эрхийг түтгэлзүүлэх тухай хуулийн төслийн талаар танай бүлгийн гишүүд ямар байр суурьтай байна вэ?
Ерөнхийлөгчийн өргөн мэдүүлсэн УИХ-ын гишүүний бүрэн эрхтэй холбоотой хуулийн төсөл дээр тухайн гишүүний бүрэн эрх байх, байхгүйгээс илүүтэй төрийн тогтвортой байдал, төрийн дархалааны тухай өргөн утга агуулгатай учраас онцгой анхаарч ажиллахгүй бол зөвхөн хүний тухай ярьж байгаа асуудал биш гэсэн байр суурьтай байгаа аж.
Эхний заалт буюу УИХ-ын гишүүн гэмт хэрэг үйлдэж байгаад газар дээрээ баригдвал бүрэн эрхийг нь түтгэлзүүлнэ гэсэн заалтыг дэмжинэ. Харин хоёр дахь заалт болох мөрдөн байцаагчийн санал болгосноор УИХ-ын гишүүний бүрэн эрхийг түтгэлзүүлэх тухай заалтыг дэмжихгүй гэдэнд олонх гишүүд санал нэгдсэн. Бусад намын бүлгүүд ч хоёр дахь заалт дээр санал нэгтэй байгаа гэж бодож байна.
Н.Түвшин