Шинэ оны өмнөхөн Баянхонгор аймагт дөнгөж төрөнгүүтээ хариуцлагагүй сувилагчийн буруугаас түлэгдэж гэмтсэн бяцхан охиныг Эх хүүхдийн эрүүл мэндийн үндэсний төвд эмчилж буй. Түүнийг Эрүүл мэндийн сайд Н.Удвал өчигдөр тус эмнэлэгт эмчлүүлж буй нярай охиныг эргэж очсон байна.
Эх хүүхдийн эрүүл мэндийн үндэсний төвд 10 гаруй хоногийн турш эрчимт эмчилгээ хийлгэж биеийн байдал нь сайжирсан тул бяцхан охин ирэх долоо хоногт ээж аавын хамт нутаг буцахаар болжээ. Гэхдээ гуравдугаар зэргийн түлэгдэлтийн сорвийг арилгахын тулд тосон иллэгийг зургаан сарын турш хийх шаардлагатай аж. Ямартаа ч, охины биеийн байдал сайжирсан хэдий ч түлэгдэлтээс үүдэлтэй биеийн өсөлт хөгжилд нь нөлөөлхүйц өөрчлөлт гарах эсэхэд эмч нар баталгаатай хариулт өгөхгүй байгаа гэнэ. Иймд энэ хугацаанд охины аав ээж болон аймгийн эмнэлэгийн хамт олон түүний эмчилгээнд илүүтэй анхаарлаа хандуулах шаардлагатай бололтой.
П.Наран