Замын халтиргаа гулгаанаас үүдэлтэй осол аваарын тоог бууруулахаар холбогдох албаныхан дор бүрдээ хичээнгүйлэн ажиллаж байгаа хэмээн мэдээлж буй. Харин жолооч нар хотын төвийн халтиргаа гулгааг л хэт их анхаараад захын хорооллуудыг орхигдуулаад байна гэж гомдоллодог. Тэгвэл Хан-Уул дүүргийн удирдлагууд замын халтиргаа гулгаанд хэрхэн анхаарал хандуулж буй илчилсэн нэгэн хэрэг өнгөрөгч бямба гаригт болжээ.
Тодруулбал, Хан-Уул дүүргийн наймдугаар хороо буюу Сонсголонгийн гүүрний баруун талд 99-27 улсын дугаартай, “Синотрак” маркийн хүнд даацын ачааны машин дулаан дамжуулах шугам хоолойд тээглэн одоог хүртэл тэр байрандаа байсаар л байна. Уг ачааны машин энэ сарын 12-ны өдөр 23.00 цагийн орчимд Сонсголонгийн гүүрнээс Нисэхийн цагаан хаалга зүгт явж байтал урд талынх нь машин хий эргэн зогсох үеэр чиргүүл нь замын хажуу руу гулсан орсон аж. Замын хажуу тал нь огцом налуу тул жолооч чиргүүлээ татах боломжгүй халтирсаар уг дулааны шугамыг мөргөн зогссон гэнэ.
Улаанбаатар Дулаан түгээх сүлжээ ХК-ийн Ашиглалтын албаны дарга Д.Баярсайханы хэлж буйгаар Нисэхийн чиглэлийн бүх байгуууллага аж ахуйн нэгжүүдэд халаалт дулаан дамжуулах үүрэгтэй, 700 мм-ийн голчтой уг шугам хэрэв гэмтсэн бол багагүй аюул учруулах байсан аж. Тухайн үед холбогдох албаныхан ослын газарт цаг алдалгүй очиж, үндсэн шугамнаас 5-10 см-ийн шилжилт үүссэн дулааны шугамыг аюулгүй болгожээ. ЗЦГ, НМХГ-ын дүгнэлтээр уг осол авто замын халтиргаа гулгаанаас үүдсэн хэмээн тогтоосон байна.
Осол гаргасан жолооч нь Өмнөговь аймгийн “Уранбилэг” ХХК-ийн ажилтан бөгөөд Тавантолгойгоос нүүрс тээвэрлэдэг байсан аж. Тэрбээр нийслэлд ирээд хоёр хоносон бөгөөд том тэрэгний дугуй ачин Өмнөговийг зорьж яваад ийнхүү саатжээ. Холбогдох албаныхан уг машиныг хөдөлгөх боломжгүй, хэрэв дулааны шугам хагарвал Нисэх чиглэлийг хангадаг дулаан тасрах аюултай. Тиймээс ирэх тавдугаар сарын 15-н хүртэл тэнд нь бөглөөс болгон орхиж, дулаан хаагдсан үед засвар хийх нь зүйтэй гэсэн саналыг ч гаргаад байжээ.
Харин уг асуудлыг дахин судалж үзээд дулааны шугамыг гэмтээлгүйгээр автомашиныг хэсэгчлэн салгах боломжтой гэсэн байна. Ингэхдээ чиргүүл толгой хоёрыг салгаж, толгойг нь зам руу, харин чиргүүлийг дээд хэсгээр нь тайран дулааны шугаман доогуур арагш татаж авах гэнэ. Биднийг очиход машины бүхээг дотор жолоочийн хүү М.Бат-эрдэнэ таарсан юм. Тэрбээр “Аав машинаа татах кран олохоор явсан. Уг нь өнөөдөр Өмнөговьд ажлаа хийгээд явж байх байсан. Байгууллага нь ийм асуудалд орсныг мэдээгүй байгаа” хэмээн өгүүлсэн юм. Зам тээврийн осолд халтиргаа гулгаа ямар ихээр нөлөөлж, хохирол дагуулдаг гэдгийн нэгэн жишээ энэ боллоо. Тиймээс зөвхөн Хан-Уул дүүргийн холбогдох албаныхан гэлтгүй захын хорооллын авто замын халтиргаа гулгааг арилгахгүй бол энэ байтугай осол гарахыг үгүй гэх газаргүй билээ.
П.Нарандэлгэр
Б.Мөнх-Эрдэнэ