Нийслэлийн Хан-Уул дүүргийн XI хорооны нутаг, Маршалын гүүрний баруун талд барьж буй барилгын ажилчид хоорондоо зодолдсон хэргийг ихэд нууцлаж байна. Уг зодоонд Монгол болон Солонгос иргэд холбоотой бөгөөд зодоон хийсэн залуус бүгд барилгын ажилчид аж.
Зодоон болох шалтгаан нь Монгол Солонгос иргэдийн хоорондын маргаанаас болсон бөгөөд тодруулбал, 19 настай Д гэх эмэгтэй, 21 настай Ц болон БНАСАУ-ын иргэн 26 настай Ким Сон Гүг нарын хооронд маргаан болж улмаар зодоон цохиондоо тулж энэ нь олныг хамарсаар Монгол Улсын болон БНАСАУ-ын харьяат 50 орчим хүн оролцжээ.
Зодооны улмаас манай улсын харьяат 19 настай эмэгтэй Д, 21 настай Ц нар гэмтэж, Солонгосын иргэн хүндээр бэртсэн учраас эмнэлэгт хүргүүлжээ.
Дээрх иргэд нь Гэмтэл согогийг сэргээх үндэсний төвд хүргэгдсэн ч хэвлийдээ шархтай БНАСАУ-ын харьяат иргэний биеийн байдал нь хүнд байгаа гэнэ. Харин Монгол улсын харьяат залуу нуруу нугасандаа хүнд гэмтэл авч биеийн байдал нь мөн л хүнд байдалд байгаа аж.
Уг зодоон нь энэ сарын 07-ны өдөр буюу даваа гарагт болсон бөгөөд Хууль хяналтын байгууллагынхан энэ мэдээллийг ихэд нууцалж буй гэнэ. Учир нь “Даяар Монгол”, “Хөх Монгол” зэрэг үндсэрхэг үзэлт залуус хэргийг шалгах үйл ажиллагаанд саад учруулах, магадгүй тэнд ажиллаж буй гадаадын иргэдэд халдаж болзошгүй учраас дээрх шийдвэрийг гаргасан хэмээжээ.
Гэтэл өөр эх сурвалжийн хэлж байгаагаар “Зодоон болсон газар нь Монголын нэр нөлөө бүхий томоохон компани учраас тэд цагдаагийн байгууллагад мэдээллийг нууцлаач гэсэн хүсэлт тавьсан” гэнэ.
Эл зодоон болсон барилгыг “Номин холдинг” компани бариулж байгаа бөгөөд зодоонд оролцоогүй бусад ажилчдын хэлж байгаагаар Солонгос, Монгол иргэдийн зодооны шалтгаан нь ажлаас үүдэлтэй аж. Тодруулбал, тэд барилгын ажилд хэрэглэж байсан ажлын тоног төхөөрөмж, багажнаасаа болж муудалцсан гэнэ.
Одоогийн байдлаар Хан-Уул дүүргийн Цагдаагийн хэлтсийн Мөрдөн байцаах тасгийн ажилтнууд зодоонд оролцсон хүмүүсээс мэдүүлэг авч байгаа бөгөөд зодооныг хэн эхэлсэн, юунаас болж зодолдсон гэдгийг нь тодруулахаар байцаалт авч байна.
Юутай ч “Номин холдинг”-ийн барилга дээр ажиллаж байсан иргэд ажлын багажнаас болж муудалцан улмаар бие биенийхээ эрүүл мэндэд хохирол учруулжээ.