Нийслэлийн удирдлагууд 2020 он гэхэд Улаанбаатар хотын нийтийн тээврийн үйлчилгээнд метрог нэвтрүүлэх зорилт тавин ажиллаж, Японы Жайкагийн төслийн багийн дэмжлэгтэйгээр судалгааны ажлыг өнгөрсөн онд эхлүүлсэн юм.
Жайкагийн төслийн багийхан Улаанбаатарт метро байгуулах судалгааны ажлын тайлан болон, урьдчилсан техник эдийн засгийн үндэслэлийг нийслэлийн удирдлагуудад танилцуулж, энэхүү төслийг маргааш болох НИТХ-ын ээлжит хуралдаанаар хэлэлцэн шийдвэрлэхээр товлосон.
Жайкагийн төслийн багийн үзэж байгаагаар Улаанбаатар хотод 2030 он гэхэд хотын хүн ам 1,7 сая хүрэх магадлалтай бөгөөд зам тээврийн эрэлт хэрэгцээ одоогийнхоос 3,1 дахин нэмэгдэх тооцоо гарчээ.
Тиймээс Ази номхон далайн орнуудын нийтийн тээврийн хамгийн дэвшилтэт тээврийн хэрэгсэл болсон метрог Улаанбаатар хотын нийтийн тээвэрт нэвтрүүлэх зайлшгүй шаардлага байгааг мэргэжилтнүүд хэлж байна.
Хэрвээ “Улаанбаатар-Метро” байгуулах ажлыг эрчимжүүлэн эхний бэлтгэл ажлыг ирэх жилээс эхлүүлэн, 2016 онд дэд бүтцийн барилга угсралтын ажлыг хийвэл 2020 он гэхэд Улаанбаатар хот метротой болох боломжтой гэнэ.
Метроны замыг Энхтайвны өргөн чөлөө дагуу хотыг зүүнээс баруун тийш холбосон 17,7 км урттай газар доогуур ба гүүрэн өргөгдсөн хэлбэрээр барих нь Улаанбаатар хотод хамгийн тохиромжтой гэж төслийн багийхан үзжээ.
Улаанбаатар метрог байгуулахдаа баруун дөрвөн замаас зүүн дөрвөн зам хүртэлх хотын төвийн 6,6 км зайд газар доогуур зам тавьж, хотын хоёр захаар өргөгдсөн хэлбэрээр барьж, авто замаас бүрэн тусгаарлагдсан системтэй байхаар тооцсон байна.
Д.Цэцэг