2013 оны 3 дугаар сарын 24-ний ОМ136 дугаар аяллын онгоц ОХУ-ын Москва хотод завсрын буулт хийх үедээ техникийн дутагдал гаран саатаж, зорчигч үйлчлүүлэгчдийн ая тухыг алдагдуулж, чирэгдэл учруулсандаа агаарын тээврийн МИАТ ХК уучлал хүсч байна.
Ийм маягийн техникийн дутагдлаас шалтгаалан нислэгийн саатал гарч болох ч түүнд урьдчилан бэлтгэх, шуурхай зохицуулах, зорчигч үйлчлүүлэгчдээ гэх сэтгэл дутсан асуудлууд үргэлжлэн гарсанд бид цаашдаа хатуу анхаарч ажиллах болно.
Өнгөрсөн онд 4,1 тэрбум төгрөгийн алдагдалтай ажилласан, 40 тэрбум орчим төгрөгийн банкны зээлтэй, харилцагч байгууллагууддаа 10 гаруй тэрбум төгрөгийн өртэй, санхүүгийн хувьд асар хүнд байгууллагыг хүлээн авсан удирдлага аюулгүй байдлыг илүү өндөр төвшинд хүргэх, зардлыг бууруулах, орлогоо өсгөх, үйлчилгээгээ сайжруулах, компанидаа ил тод, шударга засаглал тогтоохоор ажиллаж, аажмаар нааштай үр дүнд хүрч байна. Дандаа түрээсийн, харьцангүй насжиж яваа онгоцуудаа шинэ онгоцуудаар солихоор ажиллаж байна. Энэ оны 6 дугаар сард шинэ Боинг 767-300 маягийн агаарын хөлөг орж ирнэ. Энэ агаарын хөлөг зорчигчдын тав тухыг орчин үеийн шийдлээр хангаснаараа онцлогтойгоос гадна найдвартай ажиллагааг хамгийн өндөр төвшинд хангах болно.
Компанийн ажилтнуудын цалин хөлсийг ур чадвар, туршлага, үр дүн, компанид оруулж байгаа хувь нэмэртэй нь холбосон ил тод, шударга тогтолцоо тогтоохоор ажиллаж байна.
МИАТ ХК-ийн шинэ удирдлага аливаа зардлыг багасгахад чиглүүлсэн цогц арга хэмжээ авснаар зөвхөн томилолтын зардлыг л гэхэд 20 хувиар буурууллаа. Бүтээл багатай орон тоонуудыг цомхотголоо. Агаарын хөлгийн техникийн үйлчилгээ, засвар, зорчигч үйлчилгээ олон улсын хэмжээнд үнэлэгдэж, Европын холбооны техник үйлчилгээний сертификат, Скайтракс байгууллагын 3 одны үнэлгээ авлаа. Онгоцны шатахууны үнийг багасгахаар өөрийн саваар дамжуулан сумлагаа хийх, багцалсан тендер зарлах, хоёр дахь эх үүсвэрээс хангалт хийхээр ажиллаж тодорхой үр дүнд хүрч эхэлж байна.
Он гарсаар нислэгийн цаг баримтлалыг 93, суудал ашиглалтыг 78 хувиас дээш хувьд хүргэж, агаарын тээврийн зах зээлийн 53-аас дээш хувийг эзэлжж байна.
Манай компани 2011 онд Олон улсын агаарын тээврийн байгууллага ИАТА-ын аюулгүй байдлын аудитын шалгалтаар амжилттай дүн авч, Монгол дахь иргэний нисэхийн үйл ажиллагаа явуулж буй хүлээн зөвшөөрөгдсөн цорын ганц гишүүн болсон бөгөөд энэ оны 9 дүгээр сард ээлжит аудитаа хийлгэх гэж байна. Илүү ая тухыг бодолцон Сөүл, Хонконгоос нисэх зорчигчдын бүртгэлийг хотын төвд хийх тогтолцоонд орсноос гадна усан тээврээр Хонконгоос Макао явах зорчигчдыг бүртгэх боломжтой болсон юм.
Гадаад орнууд дахь техникийн үйлчилгээний баазаа бэхжүүлэх, бусадтай хамтран ажиллаж саатлыг багасгах системчилсэн арга хэмжээг цаашдаа үргэлжлүүлэн авах болно. Нислэгийн тогтворжилтыг илүү дээшлүүлж, зарласан нислэгийг цагийг нь тулган зорчигч цөөн гэдэг шалтгаанаар цуцалсан асуудалдаа ч дүгнэлт хийж ажиллах болно.
Гэвч бидний ажилд дутагдал оршиж, зорчигч, үйлчлүүлэгчид рүүгээ хандсан ажилд илүү анхаарал тавихыг Москва хотод гарсан саатал харууллаа. Зорчигчдыг үнэн зөв мэдээллээр хангах, тогтсон журмын дагуу хоол, байраар хангах, хэвлэл мэдээллийн хэрэгсэлтэй ойр ажиллах шаардлагатай байна. Гадаад улсад компанийг төлөөлөн ажиллаж байгаа хүмүүст тавих шаардлагыг чангатгах, тэдний зүгээс аюулгүй байдал, үйлчилгээний тогтсон стандарт, журмуудыг хатуу мөрдөж, зорчигчидтой чин сэтгэл гарган ажиллахыг шаардах болно. Москва хотноо сая болсон саатлын үеэр хангалтгүй ажилласан Төлөөлөгчийн газрын ажилтнуудыг эргүүлэн татах шийдвэрийг гаргалаа. Бид санхүүгийн хувьд хүндрэлтэй байгаа ч тусгайлан онгоц гаргаж 200 гаруй сая төгрөгийн зардал гарган бүх зорчигчийг Улаанбаатарт авч ирсний дээр хохирлын нөхөн төлбөрт тус бүр 200 доллар олгосон болно.
Цаашид зорчигч, үйлчлүүлэгчдийг хүндэтгэсэн, аюулгүй, найдвартай үйлчилгээг үзүүлж байхын төлөө хичээн ажиллах болно.
Москва хотын “Шереметьево” олон улсын нисэх буудалд болсон үйл явдлын төлөө Та бүхнээс дахин уучлалт хүсч байгааг хүлээн авна уу.
МИАТ ХК