Улаанбаатар хот, Анкара хот хоорондын харилцаа, хамтын ажиллагааны хүрээнд Бүгд Найрамдах Турк улсын Анкара хотын Иргэдийн хурлаас Улаанбаатар хотын “Анкара”-гийн гудамж буюу  "Зоос гоёл" ХХК-ийн уулзвараас СУИС хүртэлх гудамжны тохижилтыг өөрийн хөрөнгө оруулалтаар хийхээр шийдвэрлэсэн юм.  Бүгд Найрамдах Турк улсын Анкара хотоор овоглосон уг гудамж нийт 2.8 га талбайг эзэлдэг бөгөөд тус гудамжийг тохижуулахад 700 мянган ам.доллар зарцуулахаар 2010 онд талууд гэрээнд гарын үсэг зурсан билээ. Туркийн Олон улсын хамтын ажилллагаа, хөгжлийн удирдах газар буюу ТИКА энэхүү бүтээн байгуулалтын ажлыг зохион байгуулж  тендер зарлахад гүйцэтгэгчээр Анчера ХХК болон туслан гүйцэтгэгчээр Карие ХХК нь шалгаран 2011 оны 07-р сарын 18-наас эхлэн ажлаа эхлүүлсэн юм. Тохижилтын ажлын хүрээнд тус гудамжны ногоон байгууламж, явган зам, Ата туркийн нэрэмжит ерөнхий боловсролын 5 дугаар дунд сургуулийн гадна талбайд Туркийн уламжлал болох NAZAR-г бэлэгдсэн байгууламж, усан оргилуур, амрах  талбай, гэрэлтүүлгийн ажлууд хийгдсэн юм.  Мөн орчин үеийн шаардлага хангасан гэрэлтүүлгээр чимэглэж, европ стандартаар тохижилтын ажлыг гүйцэтгэн хоёр жилийн хугацаанд бүрэн тохижуулж дуусгахаар төлөвлөсөн. Одоо Анкарагийн гудамжны тохижолтын ажил бүрэн дууссан бөгөөд 2013 оны 4 дүгээр сарын 12-нд албан ёсоор нээлтээ хийхээр боллоо. Энэ үеэр Бүгд Найрамдах Турк Улсын Ерөнхий сайд, эрхэмсэг ноён Тайип Эрдоган манай Улсад айлчлах бөгөөд айчлалын хугацаандаа Улаанбаатар хотын Анкарагийн гудамжны нээлтэнд оролцохоо албан ёсоор мэдэгдээд байна гэж Нийслэлийн Хэвлэл мэдээлэл, олон нийттэй харилцах хэлтсээс мэдээлээ.