2011 оны долдугаар сард БНСУ-д орсон их борооны үеэр Кёнгиду, Кунгжиам хэмээн газар амьдарч байсан эгч дүү хоёр хөрш айлын эмээдээ тусалж байгаад амиа алдсан хэрэг гарсан. Уг хэргийг тухайн үед хөрш эмээгийн өгсөн мэдүүлгийн дагуу талийгаач нарт харамсал илэрхийлээд өнгөрсөн билээ. Харин тус улсаас жил хагасын дараа амиа алдсан монгол бүсгүйчүүдийн ар гэрт нөхөн олговор олгохоор болжээ. Хэргийг эргэн сануулахад, тус мужид амьдарч байсан монгол охин 18 настай монгол охин н.Урангоо болон түүний ээжийн эмэгтэй дүү, тухайн үедээ гэдсэндээ гурав дах хүүхдээ тээж байсан н.Даваа (32) нар борооны ус байр руу нь нэвтрэн орж ирэхэд гэрийнхээ хажуу дах жижигхэн усын сувгийг тагласан хаалтыг аваад өг хэмээн гуйсан хөрш эмээд туслахаар очсон юм. Тусламж гуйсны дагуу эхлээд ганцаараа очсон охин, жирэмсэн эгчийгээ дуудан хамтдаа хаалтыг авах гэж оролдож байхдаа уулнаас гэнэт бууж ирсэн усанд урсаж амь насаа алдсан аж. Гэвч тухайн үед тэднээс тусламж гуйсан эмгэн хүн амины хэрэгт холбогдохоос айж,  хоёр монгол бүсгүй хаалтыг авах гээд чадалгүй буцаад гэртээ харьсан гэж мэдүүлсэн тул талийгаач нарын ар гэрийнхэнд нь амь насны төлбөр оногдуулаагүй аж. Гэтэл уг хэргээс гарснаас хойш нэг жил гурван сарын дараа гэрч гарч ирж үнэн зөвийг мэдүүлснээр БНСУ-аас тэдний ар гэрт мөнгөн тусламж үзүүлэхээр болжээ. Тодруулбал, уг гэрч болох Солонгос бүсгүй  тухайн өдөр уулнаас их ус бууж ирэхийн өмнөхөн тусламж гуйсан  эмгэний гэрийн урдуур гарч өнгөрөхдөө талийгч жирэмсэн эмэгтэйн гутлыг үүдэнд нь харсан аж. Цаг хугацаагаар нь тооцвол Монгол бүсгүйчүүд уулнаас үер буух үед замын эсрэг талд байх гэртээ очиж амжих боломжгүй бөгөөд тэд эмгэнд тусламж үзүүлж байгаад нас барсан нь саяхан батлагджээ. Уг мэдүүлгийн дагуу  тусламж гуйсан эмгэн өнөөг хүртэл худлаа хэлж байсандаа уучлалт гуйсан аж. Харин  Монгол бүсгүйчүүд бусдад тусалж байгаад амиа алдсан хэмээн тогтоосны дагуу Солонгос улс тэдний ар гэрийнхэнд тус бүрд нь 200 сая вон буюу 400 сая вон төлөх шийдвэрийг шүүхээс эцэслэн гаргасан байна. П.Наран