УИХ дахь МАН-ын бүлгийн нэр бүхий 14 гишүүн цалин тэтгэвэр, тэтгэмжийг  нэмэх тухай тогтоолын төсөл санаачилсан тухай УИХ-ын гишүүн Б.Бат-Эрдэнэ, Ж.Бат-Эрдэнэ, Д.Сарангэрэл, Я.Содбаатар, Ж.Энхбаяр, Д.Оюунхорол  нар өнөөдөр  мэдээлэл хийлээ.

Тэд цалин, тэтгэврийг 30 хувиар нэмэгдүүлэх, хөдөлмөрийн хөлсний доод хэмжээг шинэчлэн тогтоох шаардлагатай хэмээн үзэж буйгээ илэрхийлэв. Өнгөрсөн хугацаанд Шинэчлэлийн Засгийн газраас цалин, тэтгэврийг нэмэгдүүлээгүй, үнийн өсөлтийг хязгаарлах зорилгоор тодорхой хөтөлбөр хэрэгжүүлж, 740 тэрбум төгрөгийг аж ахуйн нэгжид олгосон. Гэвч бараа, бүтээгдэхүүний үнэ тогтворжсонгүй, эсрэгээрээ өссөн. Нэг үгээр хэлбэл, МАН Засгийн газрыг удирдаж байхдаа цалин, тэтгэвэр, тэтгэмжийн хэмжээг нэмж, уул уурхайн баялгаас иргэдэд 800 тэрбум төгрөгийг олгосон бол Шинэчлэлийн Засгийн газар цалин, тэтгэвэр, тэтгэмжийн хэмжээг нэмэгдүүлсэнгүй. Харин хэдхэн аж ахуйн нэгжид 740 тэрбум төгрөг олгосон. Ийм арга хэмжээ авсан ч энэ оны эхний гурван сарын байдлаар инфляци 11.3 хувьд хүрсэн үзүүлэлттэй байгаа аж.

Инфляци ийн өсөх нь дундаж амьдралтай иргэд, дунджаас доогуур орлоготой иргэдэд хамгийн хүндээр тусаад буй. Тиймээс дээрх нэр бүхий гишүүд төрийн албан хаагчдын цалин болон тэтгэвэр,тэтгэмжийг 30 хувиар нэмэгдүүлэх хөдөлмөрийн хөлсний доод хэмжээг шинэчлэн тогтоох тухай асуудлаар Засгийн газарт үүрэг өгөх тухай УИХ-ын тогтоолын төслийг удахгүй УИХ-д өргөн мэдүүлэх юм байна.

Н.Бүжин