Шинэчлэлийн Засгийн газрын 2012 оны арвандүгээр сарын 24-ний өдрийн 137 дугаар тогтоолоор баталсан “Монгол Улсын Үндэсний хиймэл дагуул хөтөлбөр”-ийг хэрэгжүүлэхэд нэн даруй шийдвэрлэх шаардлагатай асуудлуудаар Засгийн газрын хуралдааны V дугаар тэмдэглэл гарсан. Уг тэмдэглэлд сансрын холбооны болон тандан судалгааны хиймэл дагуул хөөргөх төсөл хамтран хэрэгжүүлэх туршлагатай өндөр хөгжилтэй оронтой Засгийн газар хоорондын уулзалт, яриа хэлцээ хийх арга хэмжээ авч ажиллахыг Гадаад харилцааны яам болон Мэдээллийн технологи, шуудан, харилцаа холбооны газар (МТШХХГ)-т даалгасан. Энэ ажлын хүрээнд МТШХХГ болон холбогдох газруудын  төлөөлөгчид АНУ-ын Вашингтон хотноо өнгөрөгч гуравдугаар сарын 18-21-ний өдрүүдэд “Satellite 2013” олон улсын хурал, үзэсгэлэнд оролцлоо. Дэлхийн 350 гаруй байгууллага, 12000 гаруй төлөөлөгч оролцсон тус арга хэмжээнд манай төлөөлөгчид харилцаа холбооны хиймэл дагуул үйлдвэрлэгч, хөөргөгч, даатгагч, оператор, эрсдлийн менежмент, зөвлөх үйчилгээ үзүүлэгч чиглэлээр 20 гаруй уулзалт хийсэн байна. Түүнчлэн тэмдэглэлийн хүрээнд Япон улсын Эдийн засаг, худалдаа үйлдвэрлэлийн яамнаас гаргасан тандан судалгааны хиймэл дагуул хамтран хөөргөж, ашиглах санал болон Япон улсын JSAT компаний холбооны хиймэл дагуул хамтран хөөргөж, ашиглах саналтай танилцах уулзалтыг зохион байгуулж МТШХХГ, холбогдох яамны төлөөлөл, Сансрын үндэсний зөвлөлийн гишүүд оролцлоо. Уулзалтын үр дүнд хиймэл дагуулын үйлдвэрлэлийн чиглэлээр дэлхийд тэргүүлэгч АНУ-ын Boeing Satellite System International, Итали-Францын хамтарсан Thales Alenia Space, Европын холбооны Atrium, хиймэл дагуул хөөргөлтийн үйлчилгээний чиглэлээр тэргүүлэгч Францын Arianespace, АНУ-ын SpaceX, Орос-АНУ хамтарсан ILS, мөн харилцаа холбооны оператор үйлчилгээний тэргүүлэгч АНУ-ын Intelsat, SES, Канадын Telesat, өргөн нэвтрүүлгийн оператор компани болох Asia Broadcasting Satellite зэрэг  компани Монгол Улсад ирж хамтран ажиллах санал солилцох хүсэлтээ албан ёсоор илэрхийллээ. Уулзалтуудыг энэ сарын 15-22-ны өдрүүдэд Гадаад харилцааны яаманд зохион байгуулж байна. Дээрх уулзалтуудын үр дүнг нэгтгэн энэ сард багтаан Засгийн газрын хуралдаанд танилцуулах аж. П.Наран