Чуулганы нэгдсэн хуралдаан дээр Ерөнхий сайдыг огцруулах эсэх асуудлыг хэлэлцэж байх үеэр УИХ-ын гишүүн Д.Хаянхярваа сэтгүүлчдэд болон Ерөнхий сайд Н.Алтанхуяг, Хууль зүйн сайд Х.Тэмүүжин нарт гомдлын үг дайв. Тэрбээр "Намайг бүтэн жилийн турш цагдаад шалгагдаж байна гэж бичиж байна. Хийсэн ажлынхаа төлөө хариуцлага хүлээхэд бэлэн. Би Төсвийн хуулийг хэрэгжүүлж ажилласан. Үүнийхээ төлөө ял эдлэх, шүүхийн өмнө хариуцлага хүлээх ёстой бол, би бэлэн байна.
.
Х.Тэмүүжин сайдад хандаж хэлмээр байна. Энэ хууль хяналтын байгууллагынхан чинь бүх хүнийг ингэж дарамталдаг юм уу, онцолж хэдэн хүнийг ингэж дарамталдаг юм уу. Саяхан телевизээр "Д.Хаянхярваагийн гэрт нэгжлэг хийх гэсэн чинь зугтаагаад баригдахгүй байна" гээд байх юм.Би энд сууж байна. Хууль хяналтын байгууллагын ажлыг би хүндэтгэдэг. Ямар ч асуудлаар мэдүүлэг өгөхөд бэлэн. Гэр оронд нэгжлэг хийх шаардлагатай бол би нэгжүүлнэ. Байнга эцгийг нь шоронд хийнэ гэж яриад байхад үр хүүхдэд нь ямар байх вэ. Бодож үзсэн үү" хэмээн бухимдан асуусан.
.
Харин үүний хариуд Ерөнхий сайд "Шинэчлэлийн Засгийн газар гарч ирээд юмыг жаахан илт тод гаргаж ирээд байна. Тэрийг надтай юм уу, Х.Тэмүүжин сайдад нааж яриад байх хэрэггүй. Хэвлэл мэдээллийн хэрэгсэл юу бичихийг та бид хоёрын хэн ч мэдэхгүй. Миний чинь өөдөөс баахан юм бичээд тавьчиж байгаа юм чинь. Хэдүүлээ хэвлэл мэдээллийг захирдаг хүмүүс биш ээ. Монголын хууль хяналтын байгууллага шударга байх ёстой. Үүний төлөө Х.Тэмүүжин сайд ажиллаж байгаа" гэсэн тайлбарыг хийлээ.
Д.Цэцэг