Премьер лигийн өчигдөр явагдсан ээлжит тойргийн тоглолтод Ливерпуль багийн довтлогч Луис Суарес, Челсигийн хамгаалагч Бранислав Ивановичийг хазсан хэрэг гарсан билээ. Тэгвэл Суарес болчимгүй үйлдэл гаргасныхаа төлөө уучлал гуйсан байна. Тэрбээр “Би Ивановичтой утсаар холбогдсон. Түүнээс өөрөөс нь уучлал гуйсан. Тэр ч намайг уучилсанд баяртай байна” хэмээн twitter-дээ бичжээ. Багийнхаа дасгалжуулагч болон бусад гишүүд, хөгжөөн дэмжигчдээсээ тэрбээр мөн хүлцэл өчөөд байсан юм. Болсон үйл явдлын талаар багийн менежер Брендан Рожерс “Бичлэгийг дахин үзэж, Луистай өөртэй нь ярилцсан. Энэ бол үнэхээр хүлээн зөвшөөрч болохгүй бүдүүлэг үйлдэл байсан. Түүнийг дахин болчимгүй зүйл хийхээс би сэргийлэх ёстой. Ямар ч хувь тоглогч багаас илүү чухал биш юм. Манай баг бол асар их үнэ цэнэ, өв уламжлалтай баг. Клубээс илүү зүйл энд байхгүй. Ямар ч тоглогч, ямар ч дасгалжуулагч байсан энэ тэдэнд хамаатай. Багийн бүх тоглогч, гишүүд, дасгалжуулагч нар талбай дээр болон талбайн гадна өөрийн багаа төлөөлж байдаг гэдгийг байнга санах хэрэгтэй” хэмээсэн байна. Харин хохирогч Ивановичийн багийн анд, хаалгач Петр Чех “Тоглогчид бол хойч үеийнхэндээ үлгэр жишээ болдог. Маш их хүндлэлийг хүлээсэн хүмүүс байдаг. Энэ үйл явдал маш муу жишээ боллоо. Би үйлдлийг нүдээр хараагүй ч хүмүүс надад яг юу болсныг хэлсэн. Суарес үргэлж л нүднээс далдуур жижиг алдаануудыг хийж байдаг” гэжээ.   Ж.Цогтгэрэл