УИХ-ын чуулганы хуралдаанаар УИХ-ын дэд дарга С.Баярцогтын ёс зүйн зөрчлийн тухай асуудлыг хэлэлцлээ. УИХ-ын гишүүн Д.Батцогт, Н.Батцэрэг, Б.Борчулуун, С.Ганбаатар, Ц.Даваасүрэн, М.Сономпил, Г.Уянга нар энэ сарын 15-ны өдөр УИХ-ын даргад алба бичиг илгээж УИХ-ын дэд дарга С.Баярцогтын гадаадад байгуулсан компани болон банкин дахь дансны мэдээллээ хөрөнгө орлогын мэдүүлэгтээ тусгаагүй асуудлыг Ёс зүйн дэд хороогоор хэлэлцүүлэх шаардлага тавьсныг УИХ-ын дарга Ёс зүйн дэд хороонд шилжүүлсэн юм. Иймээс Ёс зүйн дэд хороо энэ сарын 23-ны өдөр хуралдаж УИХ-ын гишүүн С.Баярцогтын ёс зүйн зөрчлийн тухай асуудлыг хэлэлцээд УИХ-ын гишүүн С.Баярцогт нь УИХ-ын гишүүний Ёс зүйн дүрмийн 4.1 дэх заалтыг зөрчсөн нь ёс зүйн хариуцлага хүлээлгэх үндэслэл мөн болох тул түүнд хариуцлага хүлээлгэх асуудлыг Ёс зүйн дэд хорооны дүрмийн 9.1.3 дахь заалтын дагуу УИХ-ын чуулганы нэгдсэн хуралдаанаар хэлэлцүүлж шийдвэрлэх нь зүйтэй гэж дэд хорооны хуралдаанд оролцсон гишүүдийн олонх нь үзсэн байна.
Ёс зүйн дэд хорооны санал, дүгнэлттэй холбогдуулан гишүүн С.Бямбацогт, Ц.Даваасүрэн, Г.Уянга, Ц.Оюунбаатар, Ө.Энхтүвшин, Ц.Нямдорж нар асуулт асууж тодруулав. Дэд хорооны дарга М.Батчимэг гишүүдийн асуултад хариулахдаа, Ёс зүйн дэд хороо өнөөдөр мөрдөж буй дэд хорооны дүрмийн хүрээнд асуудлыг шийдэж чуулганы нэгдсэн хуралдаанд оруулж ирсэн. Үүднээс илүү шийдвэр гаргах боломж дэд хороонд байхгүй гэдгээ хэллээ.
Танилцуулгын дараагаар гишүүд асуулт асууж санал хэлсэн юм.
УИХ-ын гишүүн Г.Уянга: Намынхан нь С.Баярцогтыг хамгаалж үлдэх юм байна. Энэ бүхэн нам дамнасан санхүүгийн бүлэглэл бий болсныг харуулж байна. Би хувьдаа С.Баярцогт өөрөө хүсэлтээрээ дэд даргын албан тушаалаа өгнө гэж байгаа нь өнгөлөн далдлалт. Энэ дансаар ямар гүйлгээ орсон бэ гэдгийг Эрүүгийн цагдаагийнхан нарийвчлан шалгах хэрэгтэй. Хуулийн байгууллагад Ёс зүйн дэд хороо яагаад хандаагүй юм бэ.
УИХ-ын гишүүн Ө.Энхтүвшин: Ёс зүйн ноцтой алдаа гаргачихаад дэд даргынхаа албан тушаалыг өгөөд болчихож болохгүй. Өгчих албан тушаалгүй гишүүн яах вэ. Энэ асуудал бол эхнийх нь ч биш. Эцсийнх нь ч биш.
Ц.Оюунбаатар: С.Баярцогт гишүүний энэ асуудал ганц нэг хүний асуудал биш. Монголын төр хариуцлагатай, ёс зүйтэй байх гэдэгтэй уялдаж байгаа. Өөрийнхөө намын гишүүнд зөөлөн хандаж байна гэсэн байр суурьтай байгаа нь харагдаж байна.
Ц.Нямдорж: УИХ-ын гишүүн гэмт хэрэг үйлдсэн бол эргүүлэн татна гэсэн заалт хуулинд бий гэх зэргээр гишүүд саналаа хэлсэн юм.
Дэд хорооны санал дүгнэлтийг хэлэлцэж дуусаад УИХ-ын гишүүн С.Баярцогт үг хэллээ. Тэрбээр "Дараа нь гишүүн С.Баярцогт ёс зүйн хариуцлага хүлээж УИХ-ын дэд даргын албан тушаалаас чөлөөлөгдөх хүсэлт гаргасан, чуулган, байнгын хорооны хуралдаан дээр гишүүдээс гарсан шүүмжлэлийг анхаарч хүлээж авч буйгаа хэллээ. Мөн тэрээр олон улсын эрэн сурвалжлах сэтгүүлчдийн байгууллага түүнийг татвараас зугатсан, мөнгө угаасан гэж үзээгүй зөвхөн гадаадын банкин дахь дансаа хөрөнгө орлогын мэдүүлэгтээ мэдүүлсэн эсэхийг л тодруулахыг хүссэн гэдгээ хэллээ " гэлээ.
Ингээд С.Баярцогтыг УИХ-ын дэд даргын албан тушаалаас чөлөөлөх нь зүйтэй гэсэн томьёоллоор санал хураалт явуулахад, чуулганы нэгдсэн хуралдаанд оролцож байгаа нийт гишүүдийн 87,5 зөвшөөрснөөр С.Баярцогтыг УИХ-ын дэд даргын албан тушаалаас чөлөөллөө.
Д.Цэцэг