Шинэчлэлийн Засгийн газраас уламжлал болгон “Шинэчилж шийдье” уулзалтыг зохион байгуулж байгаа билээ. Өнөөдөр дээрх уулзалтаар 8 хувийн хүүтэй орон сууцны зээлийн тухай Ерөнхий сайд Н.Алтанхуяг, Барилга хот байгуулалтын сайд Ц.Баярсайхан, Монголбанкны ерөнхийлөгч Х.Золжаргал нар мэдээлэл өглөө. Энэ үеэр Ерөнхий сайд Н.Алтанхуяг “Шинэчлэлийн Засгийн газар байгуулагдаад есөн сар ажиллалаа. Энэ хооронд зургаан хувийн хүүтэй зээлээс болж нэлээд олон иргэн хохирсон. Тиймээс орон сууцны зээлийн орчныг бид “Шинэчилж шийдье” гэж үзэн ажиллаж эхэллээ. Гэхдээ нэг зүйлийг ойлгох хэрэгтэй. Орон сууцны зээлийн гол дайсан нь үнийн өсөлт юм. Үнийн өсөлттэй үед иргэдээ орон сууцжуулах дорвитой ажил хийж чадахгүй. Биднийг ажил авч байх үед инфляци, өргөн хэрэглээний бараа бүтээгдэхүүний ханшийн өсөлт 17 хувьтай байсан. Тэгвэл одоо бид инфляцийг нэг оронтой тоонд орууллаа. Тиймээс хөтөлбөр хэрэгжүүлэх боломж бий болж байна. Тэр зургаан хувийн хүүтэй зээлэнд 80 орчим тэрбум төгрөг гараад дууссан. Одоо бол мөнгө дуусахгүй. Урт хугацааны эх үүсвэрийг бий болгож байна. Энэ бол хамгийн чухал. Дуусчих вий гэснээс л дараалал өсгөөд бөөн асуудал үүсгэдэг. Одоо бол ийм дараалал, эмх замбараагүй байдал үүсэхгүй. Мөн өмнө нь зээлийн эх үүсвэр бага тул нэг банкаар дамжуулж зээл олгоод л дуусдаг. Одоо бол ялгавар байхгүй. Шалгуур хангаж байгаа бүх банк зээл олгох боломжтой. Харин зээл авах иргэдийн хувьд тогтвортой ажлын байр л хэрэгтэй. Тэгснээр зээлээ төлөх боломжтой болно. Иргэд чадвал хоёр ажил хийх хэрэгтэй. Чардайтал ажиллах хэрэгтэй. Энэ л иргэдэд тавих ганц шалгуур” хэмээлээ.
6
Мөн “Өмнө нь 50 ам метр талбайтай орон сууцны зээл олгож байсан бол энэ удаад 80 ам метр талбайтай орон сууцны зээл байх боломжтой. Энэ зээл ирэх долоо хоногийн даваа гараг буюу 17-ны өдрөөс зээл олгож эхэлнэ” гэлээ.
Б.Одон