Гэр бүлээрээ нийлж хар тамхи хилээр гарган зөөвөрлөж, бусдад худалдахыг завдсан хэрэгт буруутгагдсан С.Наранбаатар, Ч.Эрдэнэбаатар, Э.Гоомарал, Э.Оюун, О.Навчаа, Хятад улсын иргэн Вонг Син Ян, Р.Лена нарын давж заалдах шүүх хурал өнгөрсөн сарын сүүлчээр Цагдан хорих төвийн шүүх танхимд болсон. Аав ээж нь хоёр охинтойгоо хүргэнтэйгээ нийлж гэмт хэрэг үйлдсэн байна. Э.Гоомарал, Э.Оюун хоёр нь Ч.Эрдэнэбаатарын охин бөгөөд Э.Гоомаралын нөхөр нь С.Наранбаатар ажээ.

Эд нарт холбогдох анхан шатны шүүх хурал өнгөрсөн нэгдүгээр сард Баянзүрх дүүргийн шүүхэд  болсон ч хамсаатан гэх хоёр хүнд холбогдох хэргийг нь цагаатгаж, бусдад нь чанга дэглэмтэй хорих ангид 10-15 жил хорих ялыг тус бүр оноосон билээ.

Тэд уг шийдвэрийг эсэргүүцэж өмгөөлөгчөөрөө дамжуулан давж заалдах гомдлоо гаргасан ч анхан шатны шүүхийн шийдвэрийг нь хэвээр үлдээжээ.  Тэгвэл тэд мөн л Дээд шүүхэд хандсан байгаа. Тэдний гомдлыг хэлэлцэх шүүх хурал баасан гаригт буюу 21-нд хэлэлцэхээр болжээ. Монголд хар тамхи зөөвөрлөн оруулж ирдэг байсан гэх Хятад улсын иргэн Вонг Син Яныг гэмт хэргийн толгойлогч, бусдыг энэ төрлийн хэрэгт уруу татсан гэдэг үндэслэлээр буруутгасан хэрнээ хэргийг нь хэрэгсэхгүй болгож цагаатгажээ.

Б.Одон