УИХ-ын нэгдсэн чуулганаар АТГ-ын даргад Н.Ганболд, дэд даргад Б.Хурц нарыг Ерөнхийлөгчийн зүгээс нэр дэвшүүлснийг хэлэлцэж эхэллээ. Хууль зүйн байнгын хорооны дарга Д.Одбаяр дүгнэлтээ танилцуулснаар хэлэлцүүлэг эхлэв. Дараа нь гишүүд нэр дэвшигчдээс асуулт асуулаа.
Д.Ганхуяг: Авлигын өнөөгийн байдлыг юу гэж үзэж байна. Судалж үзсэн үү. АТГ жараахайнуудтай тэмцдэг, акулуудтай тэмцдэггүй гэж ярьдаг. Хийхээр төлөвлөсөн зүйл юу байна.
Н.Ганболд: Авлигатай тэмцэх байгууллагын нөхцөл байдал өнөөдрийн нөхцөл байдлыг нарийвчилж судлаагүй. Монгол Улсын хэмжээнд авлигын индекс ухарсан гэдэгтэй санал нэг байна. Хууль эрхзүйн орчны хувьд Олон улсын конвенцыг судалсан. Цаг хугацаа бага байсан учраас нарийн хэлэх боломжгүй байна. Ажилтайгаа сайн танилцаж дүгнэлт хийснийхээ үндсэн дээр танд эргээд мэдэгдэнэ. АТГ-ын дэргэдэг зөвлөлтэй хуулийн хүрээнд хамтарч ажиллана гэж бодож байгаа.
Ц.Сэдванчиг: Авлигын эсрэг хуулиар АТГ-ын даргад тавих шаардлагыг тодорхой зааж өгсөн. Энэ хоёр хүн аль шаардлагыг нь хангасан бэ, Ерөнхийлөгчийн Тамгын газрын дарга Баттулга дарга аа? Н.Ганболд нэр дэвшигчийн тайлбарлаж буйгаар богино хугацаанд санал хүлээн авсан учраас судалгаа хийгээгүй гэж байна. Танд хэн энэ албан тушаалыг санал болгосон бэ. Та хоёр улстөрийн намын гишүүнчлэлтэй байсан уу?
Д.Баттулга: Авлигын эсрэг хуулийн шаардлагыг энэ хоёр хүн хангасан. Хуулийн дагуу энэ ажлыг хийх чадвартай. Саналыг Ерөнхийлөгч гаргасан, өөрөө санал тавьсан.
Н.Ганболд Ямар нэг улстөрийн намын харъяалал байхгүй. Ерөнхийлөгч өөрөө уулзаж санал тавьсан.
Б.Хурц: Би нам бус төрийн албан хаагч.
Ш.Сайхансамбуу: Хоёр нэр дэвшигч боломжийн хүмүүс байна. Төрийн мөнгө иддэг хулгайч нартай яаж тэмцэхээ мэддэг байх. Мөрдөн байцаалт хийхээр намуудын шахалтаар зогсоодог гэж АТГ-ынхан хэлдэг. Үүний эсрэг та 2 зогсож чадах уу. Төрийн мөнгө идсэн хулгайч нартай яаж тэмцэх вэ?
Н.Ганболд: Авлигын гэмт хэргүүдийг шалгах явцад би ажиллаж байгаагүй болохоор сайн мэдэхгүй байна. Янз бүрийн шахалт гарч гардаг гэсэн яриа хөөрөө их гарч байгаа. Би энэ бүгдийг хуулийн хүрээнд ажиллана.
Б.Хурц: Энэ байгууллага хараат бус байх ёстой. Тиймээс хуулийн хүрээнд ажиллана гэж бодож байна.
Н.Ганбямба: АТГ өмнө нь хоёр томилгоо хийсэн. Эхний дарга нь амь үрэгдсэн. Хоёр дахь дарга нь албан үүргээ гүйцэтгэж яваад баривчлагдсан. Энэ хувь заяа дайрахгүй гэх баталгаа байхгүй. Энэ томилгооны хараат байдалд орохгүй ажиллаж чадах уу?
Н.Ганболд: Бид хуулийнхаа дагуу ажиллана. Нэг далайлтаар нийгэмд бий болсон уур амьсгалыг өөрчлөхгүй. Гэхдээ бид эхлүүлж тодорхой хугацаанд үр дүнд хүрнэ. Энэ ажлыг хийхэд эрх зүйн орчинг өөрчлөх шаардлагатай бол өөрчлүүлэх санаа оноогоо өгнө гэлээ. Гишүүд АТГ гэхээр албан тушаалтнуудын эрлэг байдаг мэтээр ойлгодог ойлголтыг өөрчилж улс төрийн бүлэглэлүүдийн гар хөл битгий болоорой. Хүний эрх ардчиллыг дээдэлж ажиллаарай гэсэн захиасыг өглөө. Дараа нь АТГ-ын дарга Н.Ганболдыг томилох эсэхээр санал хураахад 58 гишүүний 55 нь зөвшөөрсөн юм. Б.Хурцыг дэд даргаа томилох саналыг дэмжих эсэхээр санал хураахад 58 гишүүнээс 54 гишүүн зөвшөөрснөөр тэд АТГ-ыг дуирдах эрхтэй боллоо.
Ийнхүү гуравдугаар сараас хойш удирдлагагүй явж ирсэн Авлигатай тэмцэх газар даргатай боллоо.