Өмнөговь аймаг эрчим хүчний доголдолд орж 10 хоног цахилгаангүй байгаа гэх мэдээлэл тархаад байгаа юм. Тус аймагт яагаад цахилгаан доголдох болсон талаар Эрчим хүчний яамны холбогдох хүмүүсээс тодруулахад
“Улсын төсвийн хөрөнгө оруулалтаар Тавантолгой-Даланзадгадын 110 кВ-ын цахилгаан дамжуулах агаарын шугам, дэд станцын барилга угсралтын ажлыг 2012-2013 онд гүйцэтгэж байгаа. Энэ ажлын хүрээнд өнгөрсөн сарын 27-ны өдрийн 03.00 цагаас 29-ны өдрийн 24.00 цаг хүртэл аймгийн төвийн 6, 10 кВ-ын шугам, дэд станцуудад техникийн шинэчлэл, туршилт тохируулгын ажлыг хийн хэрэглэгчдийг цахилгаанаар түр хязгаарласан.
Энэхүү барилга угсралтын ажлын гүйцэтгэл 97 хувьтай явж байгаа бөгөөд энэ сард багтаан улсын комисс ажиллаж Өмнөговь аймаг Төвийн эрчим хүчний системтэй холбогдож, хэрэглэгчдийг байнгын тасралтгүй найдвартай цахилгаан эрчим хүчээр ханган ажиллана.
Мөн эрчим хүчний салбарын өвөлжилтийн бэлтгэл хангах, ээлжит урсгал засвар хийх төлөвлөгөөний дагуу өчигдөр өдрийн 06.00-13.00 хүртэл “Цахилгаан дамжуулах үндэсний сүлжээ” ТӨХК-ийн эзэмшлийн Улаанбаатар-Багануурын 220 кВ-ын цахилгаан дамжуулах агаарын шугамд засвар үйлчилгээ хийх үед Өмнөговь, Дундговь, Дорноговь аймгуудад цахилгаан түр хязгаарласан” гэсэн юм.
Д.Цэцэг