Сурагчийн дүрэмт хувцасны үйлдвэрлэлийн талаар ҮХААЯ-ны Хөнгөн үйлдвэрийн бодлогын хэрэгжилтийг дэмжих газар/ХҮБХДГ/-аас өнөөдөр мэдээлэл хийлээ. Одоогийн байдлаар Солонгосоос авчирсан даавуугаар 12155 ширхэг хувцас оёж байна. Харин сүлжмэл хувцасны тухайд өнөөдрийн байдлаар 4500 ширхэг хүүхдийн ноосон майк, задгай энгэртэй цамц үйлдвэрлэжээ. Одоогоор 10 мянган хувцас дамжлага дундаа ороод явж байгаа аж. Ингээд ҮХААЯ-ны ХҮБХДГ-ийн ахлах мэргэжилтэн Б.Батцэцэгээс дүрэмт хувцастай холбоотой асуудлаар дараах тодруулгыг авлаа.
.
-Эцэг, эхчүүд шинэ дүрэмт хувцасны үийг хэтэрхий өндөр байна гэж байгаа. Үнийг бууруулах боломж бий юу?
-Үнийг манай яамнаас тогтоохгүй. Одоо зарласан үнэ бол үйлдвэрлэгчдээс гарсан. Бид үйлдвэрлэгчдээс удаа дараалан үнийн дүнг авч судалгаа хийсэн. Дүрэмт хувцасны даавууг л гэхэд Солонгосын шилдэг даавуу үйлдвэрлэдэг компанид үйлдвэрлэж байна. Тус компани жилдээ 6 сая тууш метр даавуу үйлдвэрлэдэг, даавуунд өгдөг чанарын тэмдэг эзэмшигч компани байгаа. Бид эхлээд даавуугаа онгоцоор тээвэрлэж байсан бол одоо төмөр зам болон усан замаар тээвэрлэж байгаа. Хэрвээ ирэх онд дотооддоо даавуу үйлдвэрлэвэл сурагчийн дүрэмт хувцасны үнэ тодорхой хэмжээгээр буурах боломжтой. Оёдлын үйлдвэрүүд энэ жилдээ зардлаа байж болох хэмжээгээр хэмнээд, харьцангуй ашиг бага харж ажиллаж байна.
.
Түүнчлэн монгол хонины ноос австрали хоннины ноосыг бодоход ширүүн, хялгас ихтэй, ноолуурлаг байдаг. Иймээс ноолуур шиг ялгаж, нэг кг хонины ноосноос 200 орчим гр ноолуурлаг хэсэг сонгож авдаг. Үүгээрээ даавуу болоод сүлжмэл майк, кардиган хийхэд ашиглаж байна. Иймээс үүнийг одоо зэх зээлд байгаа бохир хонины ноостой харьцуулж болохгүй. Мөн монгол хонины ноос зунгаг, үнэр ихтэй тул үнэрийг арилгах гэх мэтээр олон процесс явагддаг.
.
-Ирэх жилээс шууд даавуугаа өөрсдөө үйлдвэрлэх боломж хэр бүрдсэн бэ?
-Чингис бондоос 45 сая ам.долларыг гарган ирэх жилээс эхлээд Монголдоо даавуу үйлдвэрлэхээр болсон. Одоогоор тоног төхөөрмжөө авч амжаагүй байгаа тул Солонгос улстай хамтарч байна. Солонгост даавуу үйлдвэрлэхэд олон хүндрэл гарсан. Бид удаа дараагийн туршилтуудаар хүндрэлүүдийг арилгасан тул Монголдоо даавуу үйлдвэрлэх туршилтыг хийсэн гэсэн үг.
.
-Даавууны чанарын талаар иргэдийн дунд эргэлзээ их байгаа. Энэ талаар тодруулаач?
-Даавууны хувьд өнгөрсөн жилүүдийхээс эрс ялгаатай. Эцэг, эхчүүд болон хүүхдүүд материалыг нь барьж үзээд өөрсдөө харьцуулна биз. Чанарын ялгаа харагдана. Дүрэмт хувцасны үндсэн иж бүрдлийг Солонгосоос орж ирж буй даавуугаар үйлдвэрлэж байгаа. Үүнийг гаалийн мэдүүлэг, чанарын сертификат гээд олон зүйлээс харж болно. Мөн Монгол улсад байгаа Нэхмэлийн хүрээлэнгийн ганц ноос ноолуурын итгэмжлэгдсэн лабораториар бүх шинжилгээнүүдийг хийлгэж байгаа. Энэ даавууг агшиж, сунадаг гэсэн яриа гадуур гарсан байна билээ. Гэтэл энэ даавуу нь цаг тутамд угаахад 1.5 хувийн агшилт өгсөн гэсэн шинжилгээний хариу гарсан байгаа. Үйлдвэрлэгч компани маань ч үүнд чанарын баталгаа гаргасан. Оёж байгаа үйлдвэрүүд маань сурагчийн дүрэмт хувцсандаа 2 жилийн баталгаа олгож байна. Чанар дээр бид эргэлзэхгүй байна.
.
-Өмнөх жилүүдтэй харьцуулахад шинэ дүрэмт хувцас маш өндөр үнэтэй байна гэж шүүмжлээд байгаа?
-Боловсролын яамнаас бүх сургуулиудад судлагаа хийж манайд ирүүлсэн. Өнгөрсөн жил нийт хувцасны 10 орчим хувийг л манайд үйлдвэрлэж, бусад нь импортоор орж ирсэн байсан. Энэ нь 31-85 мянган төгрөгийн үнэтэй худалдаалагдаж байсан байна. Одоо бол зөвхөн үндсэн иж бүрдэл болох жилетик, өмд, юбка, хүрэмний үнэтэй харьцуулахад 2900-15000 төгрөгийн зөрүүтэй байгаа. Үүн дээр нэмээд эцэг эхчүүд сорочкон цамц, ноосон майк, ноосон сүлжмэл цамцыг зах зээлээс худалдаж авдаг байсан. Захиалагч талын хүсэлтээр үүнийг нэмж оруулсан.
.
-Шударга өрсөлдөөн хэрэглэгчийн төлөө газарт танайхаас ямар хариу өгсөн бэ?
-ШӨХТГ бид хууль зөрчөөгүй гэсэн хариу өгсөн. Тус газартай манайх хамтарч сурагчийн дүрэмт хувцас үйлдвэрлэж байгаа газруудад шалгалт хийсэн.
.
-Эмзэг бүлгийн болон олон хүүхэд нь ерөнхий боловсролын сургуульд сурдаг айлуудад дүрэмт хувцас хөнгөлөлттэй үнээр олгох асуудал юу болсон бэ?
-Үүнийг хариуцсан салбарын яам л шийднэ.
.
А.Энхжаргал