Энэ сарын 9-ний өдөр БНСУ-ын Сөүл хотын Хехуа дүүргийн цагдаагийн газраас тус улсад гэрээгээр ажиллаж байсан Монгол улсын иргэн 29 настай А-г хулгай, дээрмийн хэрэгт сэжиглэн саатуулжээ. Тэрээр өнгөрсөн 8-ны шөнийн 01.40 цагийн орчим Сөүл, Жунгру дүүрэг дэх иргэн Кимийн (41) том өрөөний онгорхой байсан цонхоор хууль бусаар нэвтрэн орж гэрийн эзний түрийвчин байсан 20 мянган вон, 150 мянган воны үнэтэй зөөврийн хард дискийг хулгайлан авч гарах үеэр гэрийн эзэнд баригдахаа дөхсөн аж. Гэтэл тун удалгүй 1 цагийн дараа гэмт хэрэг үйлдсэн байрныхаа дэргэдэх 3 давхрын айлын гал тогооны өрөөний цонхоор нэвтрэн орж шүүгээнээс нь хутга аван том өрөөндөө зурагт үзэн хэвтэж байгаад унтсан гэрийн эзэгтэй Пакийг (45) хутга тулган сүрдүүлж, дээрэм хийхээр завдсан гэнэ. Гэвч гэрийн эзэгтэй чанга дуугаар орилж чарлан хүчтэй эсэргүүцэл үзүүлсэн тул дээрэм хийж чадалгүй зугатаан одсон байна.
:
Харин өмнөх гэмт хэргийн мөрөөр дуудлага аван ойр орчмын гудамжинд эргүүл хийж байсан цагдаа нар харанхуй гудамжаар зугатаан явсан Монгол залууг бүсэлж саатуулсан аж. Тэрээр 2013 оны нэгдүгээр сард Солонгос улсад гэрээгээр ажиллахаар ирж, Гуангжү аймгийн нэгэн цонхны үйлдвэрт хуваарилагдан ажиллаж байсан ч ажилдаа тэнцэхгүй гэдэг шалтгаанаар өнгөрөгч долдугаар сарын сүүлээр ажлаасаа халагдсан нэгэн байсан гэнэ. Тиймээсс Сөүл хотод монголчуудын амьдардаг Жүнгү дүүргийн Гуангхидунд байр хөлслөн амьдарч эхэлсэн бөгөөд амьжиргааны мөнгөө олохоор дээрэм хийсэн гэдгээ хүлээсэн байна. Эрхэлсэн тодорхой ажилгүй түүнийг өөр бусад гэмт хэрэг үйлдсэн байх магадлалтай хэмээн үзэн цагдаагийн газраас үргэлжлүүлэн шалгаж байгаа юм байна.
:
Мөн энэ өдөр тус улсын Чунгнам Хунгсонг дах цагдаагийн газраас, айлын гэрийн цонхоор хууль бусаар нэвтрэн орж унтаж байсан Солонгос эзэгтэй Кимийг (53) хүчирхийлсэн хэргээр Монгол улсын иргэн 32 настай A-г саатуулжээ.
:
Сэжигтэн А нь өнгөрсөн 4-ний оройн 10.00 цагийн орчим найз нартайгаа архи уусныхаа дараа гэртээ ирсэн бөгөөд охинтойгоо 2-лаа амьдардаг хөрш эмэгтэйн гэрийн цонх онгорхой байгааг харж, уг цонхоор орон айлган сүрдүүлж хүчирхийлсэн гэмт хэрэг үйлдсэн хэмээн шалгагдаж байгаа аж.
.
Б.Сайнаа