Ерөнхий боловсролын сургуулийн сурагчид нэгэн жигд дүрэмт хувцастай байх нь олон давуу талтай гэж мэргэжилтнүүд үздэг. Тиймээс сүүлийн жилүүдэд бараг мартагдаад байсан дүрэмт хувцсыг орчин үед тохирсон загвар дизайнтайгаар урлаж, хүүхдүүдэд өмсгөж хэвшүүлэх бодлогыг мэргэжлийн яамнаас барьж байгаа. Түүнчлэн “Чингис” бондоос 30 тэрбум төгрөгийг оёдлын салбарт олгохоор болж, стандартын шаардлага хангасан сурагчийн дүрэм хувцас үйлдвэрлэх шаардлага тавиад байгаа.
.
Монголын сурагчдын дүрэмт хувцас үйлдвэрлэгч оёдлын үйлдвэрүүдийн холбооноос сарын өмнө дүрэмт хувцасны үнэ бараг 120-150 мянган төгрөг хүрэх нь гэж мэдээлсэн. Ингээд сурагчийн дүрэмт хувцсын талаар эцэг, эхчүүдээс санал бодлыг нь сонслоо.
.
Би энэ дүрэмт хувцасыг хүүхэддээ авч өгөхгүй
.
Дархан-Уул аймгийн иргэн Н.ОюунцэцэгСурагчийн дүрэмт хувцсыг шинэчлэх талаар зурагт, радиогоор мэдээлэл авсан. Нэг сурагчийн дүрэмт хувцсыг 120-150 мянган төгрөгөөр худалдаж авна гэхээр надад хэтэрхий үнэтэй, хэцүү санагдаж байна. Бид нар шиг дундаж амьдралтай, өдрийн хоолоо залгуулж яваа айл хүүхэддээ тийм их мөнгөөр дүрэмт хувцас авч өгвөл юугаараа амьдрах вэ. Дүрэмт хувцас үйлдвэрлэгчид хамгийн сайн материал, оёдлоор хийж байгаа гэж ярьж байхыг нь сонссон. Эцэг эхчүүд бид улиралдаа тааруулаад хүүхдүүдийнхээ хувцасыг тохируулж өмсгөж чадна. Би лав энэ дүрэмт хувцасыг хүүхэддээ авч өгөхгүй. Миний хүүхэд энэ хувцастай хувцасгүй сураад л явна. Тэд шахаж шаарвал сургалтын төлбөр нэхэж байна гэж бодно.
.
Үнийн хувьд зүгээр санагдсан
.
Баянгол дүүргийн иргэн Д.Чулуунболд-Ер нь олон хүүхэдтэй эцэг эхчүүдэд их л хүнд тусч байх шиг байна. Манай гэр бүлийн хувьд нэг сурагчтай. Өнгөрсөн жил сурагчийн дүрэмт хувцсыг 45-60 хооронд авдаг байсан бол энэ жил бага ангийн хүүхдийн хувцас бараг 80 мянга болж байгаа юм шиг байна билээ. Одоогоор мэдэгдэж байгаа юм алга. Сураг сонсох нээ, хувцасны чанар, материал сайн, дараа жил дамжуулж өмсөх боломжтой гэсэн. Ингээд бодохоор үнийн хувьд зүгээр санагдсан. Хамгийн гол нь Засгийн газраас хяналт сайн тавих ёстой. Мөн дундаас доогуур орлоготой өрхүүдийн хүүхдүүдэд хөнгөлттэй үнээр олговол зүгээр байх.
.
Төгсөх ангийн хүүхдүүдэд хохиролтой байна
.
Баянзүрх дүүргийн иргэн Б.БуяндэлгэрМанай хүүхэд энэ жил 11-р ангид орно. Тэгэхээр энэ үнэтэй хувцасыг авах хэрэг байна уу гэж бодогдож байна. Өнгөрсөн хавар 10-р анги төгсөхөд нь биеийн хэмжээг нь авсан байгаа юм. Ахлах ангийн хүүхдүүд чинь зуны гурван сард өсөж томроно биз дээ. Ингээд бодохоор төгсөх ангийн хүүхдүүдэд хохиролтой санагдаж байна.
.
Сурагчийн дүрэмт хувцас дэндүү үнэтэй санагдаж байна
.
Баянзүрх дүүргийн иргэн А.ОюунчимэгСурагчийн дүрэмт хувцас дэндүү үнэтэй санагдаж байна. Би сард 187 мянган төгрөгний тэтгэвэр авдаг. Надшиг орлоготой өрх толгойлсон эмэгтэйчүүд зөндөө байгаа шүү дээ. Бид 150 мянган төгрөгөөр хүүхэддээ дүрэмт хувцас авч өгөхөөр бусад нь яаж амьдрах юм бэ. Бас хичээлийн хэрэгсэлийг нь юугаараа бэлдэх болж байна. Үнэхээр хэцүү байна.
.
Б.Одон
П.Наран