Энэ сарын 16-наас 19-ны хооронд Шанхай хотноо болсон “IDF Darts World Cup - Shanghai 2011” дартсын дэлхийн цомын тэмцээнд Монголын Дартс Сонирхогчдын Холбоо /МДСХ/-ны 14 тамирчин амжилттай оролцож өнөөдөр эх орондоо ирлээ.
Нийт 22 орон оролцож Монгол улс “С” зоонд Итал, Япон, Испани улстай оноолт таарчээ. Ингээд Испани улсыг 1:12 харьцаатай хожиж, Японд 2:11, Италид 5:8 харьцаатайгаар хожигдсон бөгөөд зооноос Япон 35 оноогоор 1-ээр, Монгол 19 оноотой 2-оор, Итали 18 оноотой 3-аар, Испани 16 оноотойгоор 4-өөр гарсан байна.
Харин зооноос гараад шөвгийн 16-аас 8-р байрны төлөө Монголын тамирчид Францын тамирчидтай оноолт таарч 9:5 харьцаатай хожин, шөвгийн 8-аас 4-р байрны төлөө АНУ-ын багтай тоглон 10:6-аар хожигдож 5-р байр эзэлсэн аж.
Мөн ганцаарчилсан тоглолтын 501di/do болон Cricket-ийн төрөлд Ш.Ган-Эрдэнэ 100 орчим тамирчдаас 25-рт жагсаж Монголын эрэгтэй тамирчдаас хувийн амжилтаараа тэргүүлсэн бол Ц.Баатар 70 гаруй эмэгтэй тамирчдаас Cricket-ийн төрөлд шилдэг 13-т жагсаж түрүү жилийн амжилтаа 4 байраар ахиулсан амжилттайгаар төрийнхөө далбааг дэлхийн тавцанд мандуулжээ.
Тэмцээний хаалтын үеэр Монгол улс дэлхийд данстай орон болон бүртгэгдэж Дэлхийн дартсын холбооноос сертифекатаа гардаж авсан байна.