Төв аймгийн Мөнгөнморьт сумын Өндөр эрэг гэдэг газарт өнгөрсөн сарын 18-нд А – Jet компанийн JU-5566 дугаартай МИ-8 нисдэг тэрэг ослын буулт хийсэн.

Тус нисдэг тэрэгний энэ удаагийн нислэг нь Тусгай хамгаалалттай газар нутгийн тухай хуулийн 12 дугаар зүйлийн наймдахь хэсэгт заасан “аргагүйгээс бусад тохиолдолд тухайн газрын хамгаалалтын захиргаанаас урьдчилан авсан зөвшөөрөлгүйгээр агаарын хөлгөөр буулт хийх, хэт нам өндрөөр нислэг үйлдэх” гэсэн заалтыг зөрчсөн үйлдэл болжээ. Энэ тухай БОНХЯ-ны Тусгай хамгаалалттай нутгийн удирдлагын газраас мэдээллээ.

Нислэгийг зохион байгуулсан этгээд холбогдох газруудаас зөвшөөрөл аваагүй. ИНЕГ-ын албан эх сурвалж “хаашаа хөөрснийг мэдэхгүй” гэсэн мэдээллийг Хан Хэнтийн тусгай хамгаалалттай газрын захиргаанд осол болсон өдөр өгч байжээ.

Иймд  Хан Хэнтийн Улсын тусгай хамгаалалттай газрын захиргаанаас Иргэний нисэхийн ерөнхий газар, А- Jet компани, Улсын мөрдөн байцаах газрын Байгаль орчны журмын эсрэг гэмт хэрэгтэй тэмцэх 6-р хэлтэст “Дархан цаазат газарт онгоц зөвшөөрөлгүйгээр нисгэсэн албан тушаалтнуудад хуулийн дагуу хариуцлага тооцох” тухай албан тоот хүргүүлсэн байна.

Б.Буд