Дорнод аймгийн Матад сумын засаг дарга Ц.Наранцэцэгт холбогдох авилгын хэргийг Дорнод аймгийн Хэрлэн сумын шүүх энэ сарын 05,06-ны өдрүүдэд хэлэлцжээ. Мөн түүнд авилга өгсөн иргэн Т.Уранчимэг, БНХАУ-ын иргэн Ван Хунлин нарын хэргийг шийджээ. 2011 оны тавдугаар сарын 24-ний өдөр иргэн Т.Уранчимэг, БНХАУ-ын иргэн Ван Хунлин нар нь ашиглалтын тусгай зөвшөөрөлгүй “Төгссүмбэр” ХХК-ийн нэр дээр хайрга олборлох зөвшөөрөл авахын тулд Дорнод аймгийн Матад сумын засаг дарга Ц.Наранцэцэгт бусдаар дамжуулан 5 сая төгрөгийн авилга өгсөн байна.

Шүүхээс Ц.Наранцэцэгт Эрүүгийн хуулийн тусгай ангийн 268 дугаар зүйлийн 268.1 дэхь хэсэгт зааснаар төрийн албан тушаал эрхлэх эрхийг 1 жил 6 сарын хугацаагаар хасч, 3 жил, Ван Хунлин,Т.Уранчимэг нарт Эрүүгийн хуулийн тусгай ангийн 269 дүгээр зүйлийн 269,1 дэх хэсэгт зааснаар тус бүр 2 жилийн хорих ял оногдуулж, Эрүүгийн хуулийн ерөнхий ангийн 61-р зүйлийн 61,1 дэх хэсэгт зааснаар Ц.Наранцэцэгт оногдуулсан 3 жилийн хорих ялыг 1 жил 6 сарын хугацаагаар, Ван Хунлин,Т.Уранчимэг нарт оногдуулсан 2 жилийн хорих ялыг 1 жилийн хугацаагаар тус тус тэнсэж хянан харгалсан байна.